- वि.सं Invalid date format
पासाङ ल्हामु राजमार्गअन्तर्गतको रानीपौवा–पिपलटार सडकखण्डको विषयमा सांसदले सरकारसँग जवाफ माग गरेका छन्।
आइतबार प्रतिनिधिसभा बैठकमा विशेष समय लिएर माओवादी सांसद विमला सुवेदीले बजेट विनियोजन नहुँदा उक्त भेगका नागरिकले दुःख पाएको बताइन्।
‘पासाङ ल्हामु राजमार्गअन्तर्गत तीनपिप्ले–रानीपौवा सडकखण्ड प्रचण्ड सरकारको पालामा बजेट विनियोजन भई हाल निर्माण कार्य भइरहेको छ। तर, त्यही राजमार्गको रानीपौवा–पिपलटार सडकखण्डको निर्माणका लागि बजेट विनियोजन नहुँदा १० वर्षदेखि बेलकोटगढी नगरपालिका वडा नम्बर ९, १०, ११, १२ र १३ का जनता प्रत्यक्ष र नुवाकोट जिल्लाको पश्चिमी भेगका हजारौँ जनता परोक्ष प्रभावित भएका छन्। यो सडक नबन्दा करोडौँको आर्थिक क्षति भइरहेको छ,’ उनले भनिन्।
दुई घण्टामा राजधानी काठमाडौं आइपुग्ने यहाँका जनता सदरमुकाम विदुर घुमेर ५–६ घण्टा लगाएर यात्रा गर्न बाध्य भएका उल्लेख गर्दै सांसद सुवेदीले भनिन्, ‘खाद्यान्न, तरकारी, दुध, कुखुरालगायतका व्यवसायमा ठुलो मार परिरहेको छ। सरकारको गैरजिम्मेवारीका कारण यहाँका जनताले कहिलेसम्म सास्ती व्यहोर्नुपर्ने हो ? यो सडक कहिले बन्ने हो, म सरकारको जवाफ चाहन्छु।’
