- वि.सं २o८१ पौष २७ शनिबार
नेपाल राष्ट्रिय महिला क्रिकेट टिमले नेदरल्यान्ड्स र थाइल्यान्ड सम्मिलित त्रिदेशीय सिरिज खेल्ने भएको छ। नेपाल क्रिकेट संघ नेपाल (क्यान)ले सूचना जारी गर्दै प्रतियोगिता माघ १७ देखि २५ सम्म हुने जनाएको छ।
फाइनलसहित दशवटै खेल कीर्तिपुरस्थित त्रिभुवन विश्वविद्यालय क्रिकेट मैदानमा हुनेछन्। पहिलो खेल नेपाल र नेदरल्यान्ड्सबिच हुनेछ। तालिकाको शीर्ष दुई टिमले उपाधिको लागि प्रतिस्पर्धा गर्नेछन्।
क्यानले यो सिरिजबाट खेलाडीले अनुभव हासिस गर्ने आशा गरेको जनाएको छ। विज्ञप्तिमा भनिएको छ, ‘यस ऐतिहासिक सिरिजले हाम्रा महिला क्रिकेट खेलाडीहरूलाई थप प्रेरणा तथा उत्साह थप्नुका साथै नेपाली राष्ट्रिय महिला क्रिकेट टोलीलाई थाइल्यान्ड र नेदरल्यान्डका दुई टोलीसँग प्रतिस्पर्धा गर्दै थप अनुभव हासिल गर्ने अवसरसमेत प्राप्त गर्ने विश्वास लिएका छौँ।’
