- वि.सं २o८१ पौष २७ शनिबार
मकवानपुरको मनहरीमा भएको कार दुर्घटनामा मृत्यु हुनेको संख्या दुई पुगेको छ । उपचारको क्रममा चितवनको राप्ती नगरपालिका–२, गड्यौलीकी ५० वर्षीया सुनिता श्रेष्ठको मृत्यु भएसँगै दुर्घटनामा परी ज्यान गुमाउनेको संख्या दुई पुगेको हो ।
यसअघि उपचारकै क्रममा हेटौँडा उपमहानगरपालिका–४ घर भएका ६० वर्षीय सुरेन्द्रलाल श्रेष्ठको मृत्यु भएको थियो । वीरगन्जबाट चितवनतर्फ जाँदै गरेको बागमती प्रदेश ०१–०२६ च ५२५० नम्बरको स्कार्पियो र चितवनबाट हेटौँडातर्फ आउँदै गरेको बा१६च ८३२४ नम्बरको कार आपसमा ठोक्किँदा दुर्घटना भएको थियो ।
मृत्यु भएका दुवैजना कारमा सवार व्यक्ति रहेको मकवानपुर प्रहरीले जानकारी दिएको छ । मकवानपुर प्रहरी प्रवक्ता डिएसपी श्यामु अर्यालका अनुसार सुरेन्द्रले कार चलाएका थिए । यस्तै, घटनामा परी अन्य १२ जना घाइते छन् । उनीहरू सबैको चितवनको भरतपुरस्थित एलाइभ अस्पतालमा उपचार भइरहेको छ ।
शनिबार दिउँसो १ बजेको समयमा मनहरी गाउँपालिका–६ डिपाटस्थित पूर्व-पश्चिम सडक खण्डमा स्कार्पियो र कार आपसमा ठोक्किँदा १४ जना घाइते भएका थिए भने दुईजनाको मृत्यु भएको हो । घाइतेमध्ये केहीको अवस्था गम्भीर रहेको प्रहरीले जनाएको छ ।
