- वि.सं २o८१ पौष ११ बिहीबार
आगामी ३१ डिसेम्बर अर्थात् न्यू इयर इभका अवसरमा कुस्माको द क्लिफ रिसोर्टमा प्रकाश सपूतले सांगीतिक प्रस्तुति दिने भएका छन्। द क्लिफका अध्यक्ष राजु कार्कीका अनुसार यस दिन रिसोर्टमा आउने ग्राहकले गायक प्रकाश सपूतको प्रस्तुतिसँगै, फायर डान्स र लाइभ म्युजिकको मज्जा लिन सक्नेछन्।
अंग्रेजी नयाँ वर्षमा क्लिफमा जाने अतिथि र स्थानीयलाई समेत लक्षित गर्दै यस्तो कार्यक्रम राखेको उनले बताए। कार्यक्रम साँझ ६ बजे सुरु हुनेछ भने कार्यक्रममा सहभागी हुनका लागि तीन सय रुपैयाँ टिकट तोकिएको छ।
राजु कार्कीको परिकल्पना र नेतृत्वमा कालीगण्डकी नदीको खोँचमाथि पर्वत र बाग्लुङ बलेवा जोड्ने गरी बनाइएको द क्लिफमा विश्वकै दोस्रो अग्लो बन्जी जम्प सञ्चालनमा छ।
पछिल्लो समय एड्भेन्चर हबको रूपमा विकास हुँदै गएको द क्लिफमा साहसिक गतिविधिका लागि देश विदेशबाट पर्यटकहरू आउने गर्छन्।
