सडक अवरोध र चिकित्सा संकटबिच पाकिस्तानको पाराचिनारमा एक सयभन्दा बढी बालबालिकाको मृत्यु

सडक अवरुद्ध, आवश्यक सेवाहरूमा भइरहेको बाधा र कुर्रम क्षेत्रमा चलिरहेको संकटका कारण पाकिस्तानको पाराचिनारमा एक सयभन्दा बढी बालबालिकाको चिकित्सा सेवा अभावका कारण मृत्यु भएको छ।

बालबालिकाको मृत्युबारे पाकिस्तानमा व्यापक विरोध प्रदर्शन भइरहेको छ भने नागरिकहरूले पहुँच मार्गहरू तत्काल खोल्न माग गरिरहेका छन्। सडक अवरोधको विरोधमा यहाँ ६ दिनदेखि प्रदर्शन चलिरहेको छ। 

 द न्युज इन्टरनेसनलले रिपोर्टअनुसार दुई महिनाभन्दा बढी समयदेखि जारी अवरोधले स्थानीय बासिन्दाहरूलाई खाद्यान्न र चिकित्सा सेवा आपूर्तिबाट वञ्चित पारेको छ।

माथिल्लो कुर्रम तहसिलका अध्यक्ष आगा मुजामिलले भने, ‘सडक बन्दले बासिन्दाहरूलाई स्वास्थ्य सेवा र खाद्यान्नजस्ता आधारभूत आवश्यकता प्राप्त गर्न रोकेको छ। चिकित्सा सेवाको अभावमा सयभन्दा बढी बालबालिकाको मृत्यु भएको छ।’ कुर्रमका उपआयुक्तले भने जारी आदिवासी द्वन्द्व समाधानमा केन्द्रित शान्ति वार्ता सुरु गर्न जिल्लामा ग्रान्ड जिर्गा आइपुगेको घोषणा गरेका छन्। 

सरकारले यी छलफलले स्थिरता ल्याउने र सडक पुनः खोल्ने आशा राखेको छ। यसका साथै पाराचिनारका बासिन्दाको संघर्षका बारेमा चेतना जगाउन मजलिस बहदत–ए–मुस्लिमिनले आयोजना गरेको कराँचीको नुमाइस चौरंगी र लाहोर प्रेस क्लबबाहिर ऐक्यबद्धता प्रदर्शन गरिएको छ। 

खैबर पख्तुनख्वाका मुख्यमन्त्रीका सूचना सल्लाहकार ब्यारिस्टर सैफले पाराचिनार रोडलाई सुरक्षित गर्न विशेष प्रहरी बल स्वीकृत गरिएको घोषणा गरेका छन्। यस क्षेत्रमा ठुलो उथलपुथल निम्त्याएको शताब्दीयौँ पुरानो आदिवासी विवादको स्थायी समाधान खोज्ने सरकारको लक्ष्य रहेको उनले बताए। 

पाराचिनारमा जारी आदिवासी द्वन्द्वका कारण साढे दुई महिनादेखि सबै प्रमुख र साना मार्गहरू अवरुद्ध गरेर जिल्लालाई अपांगजस्तो बनाइएको छ।