- वि.सं २o८१ पौष १० बुधबार
लुम्बिनी प्रदेश सरकारले पहाडी जिल्लालाई कफीको हबको रूपमा विकास गर्न पहल सुरु गरेको छ । प्युठानको सरुमारानी गाउँपालिका बडडाँडामा रहेको चिया तथा कफी विकास कार्यालय, स्थानीय जनप्रतिनिधि तथा किसानहरूसँग प्रदेशका पहाडी जिल्लाहरूमा कफीखेतीको सम्भावना धेरै भएकाले कफी हब बनाउनेबारे बुधबार छलफल गरिएको हो ।
कृषि, भूमि व्यवस्था तथा सहकारीमन्त्री दिनेश पन्थी, मुख्यमन्त्रीका जनसम्पर्क सल्लाहकार डा. रामबहादुर राउतलगायतले सरुमारानी गाउँपालिकाका अध्यक्ष झगबहादुर विश्वकर्मा, उपाध्यक्ष वसन्ता खड्का, कफी विकास बाेर्डका प्रमुख चन्द्रप्रकाश बस्नेत र स्थानीय किसानसँग छलफल गरेका हुन् ।
पहाडी जिल्लाहरूमा कफी खेतीको सम्भावना रहेको र प्रदेश सरकारले यसका लागि पहल लिने कृषिमन्त्री दिनेश पन्थीले बताए। ‘योजना निर्माण गरेर कफीखेतीलाई विस्तार गरेर जानुपर्ने आवश्यकता छ,’ मन्त्री पन्थीले भने, ‘पहाडी जिल्लाहरूमा कफीखेतीको सम्भावना, बजार र किसानहरूको जीवनस्तर उठाउनेबारे सरकारले ध्यान दिन्छ ।’
मुख्यमन्त्रीका जनसम्पर्क सल्लाहकार राउतले कफीखेतीलाई लुम्बिनी प्रदेशका जिल्लाहरूमा विस्तार गर्नबारे छलफल सकारात्मक भएको बताए । कफीखेतीबाट किसानले राम्रो आम्दानी लिन सक्ने, यसको उत्पादन बढाउन सके अन्तर्राष्ट्रिय बजार पनि राम्रो भएकाले यसमा किसानलाई अनिवार्य जोड्नेबारेमा पहल गरिएको बताइएको छ ।
सरुमारानी गाउँपालिकाका अध्यक्ष झगबहादुर विश्वकर्माले आफ्नो पालिका दलहनबाली र मह उत्पादनको हबको रूपमा रहेको र अझ गुणस्तरीय उत्पादनका लागि प्रदेश सरकारको साथ सहयोग चाहिएको बताए।
