- वि.सं २o८१ पौष ९ मंगलबार
सिद्धार्थ राजमार्गअन्तर्गत बुटवल-तानसेन सडक खण्डको सिद्धबाबा सुरुङमार्गको तीनवटै बाईपासको 'ब्रेक थ्रु' भएको छ । आयोजनाले मुख्य टनेलको पनि काम तीव्र रुपमा गरिरहेकाे जनाएकाे छ । यस आयोजनामा ११२६ मिटर मुख्य सुरुङको लम्बाइ रहेकोमा 'ब्रेक थ्रु' हुन अब ६६ मिटर मात्रै बाँकी रहेको आयोजनाकी सूचना अधिकारी इन्जिनियर सविता ज्ञवालीले बताइन् ।
सुरुङभित्र केही समस्या आए निस्कन मिल्ने गरी यहाँ तीनवटा बाइपास बनाउने काम भइरहेको छ । तेस्रो र पहिलो बाइपास को ‘ब्रेक थ्रु’ भदौ तथा असोजमा भएकोमा दोश्रो बाईपासको ब्रेक थ्रु यही ७ पुस आइतबार भएको छ ।
सिद्धबाबा सुरुङमार्ग आयोजनाअन्तर्गत कुल तीनमध्ये सबैकाे 'ब्रेक थ्रु' भएको हो । अब मुख्य टनेलको 'ब्रेक थ्रु' हुन बाँकी छ । यहाँ पहिलो बाइपासको लम्बाई एक सय ५१ मिटर , दोस्रोको लम्बाइ एक सय ६१ मिटर र तेस्रोको एक सय ३० मिटर लम्बाइ रहेको छ ।
आयोजनाकी सूचना अधिकारी ज्ञवालीका अनुसार २६ भदौमा तेस्रो र ४ असोजमा पहिलो बाइपास खनेर सकिएको थियो । पहिलो बाइपास माथिल्लो सिद्धबाबा मन्दिर तर्फको र तेस्रो बाइपास दोभान ड्याम साइडतर्फको हो । अब मुख्य टनेलको पनि यही महिनाभित्रै 'ब्रेक थ्रु' गर्ने गरी काम भइरहेको इन्जिनियर ज्ञवालीले बताइन् ।
चाइना स्टेट कन्स्टक्सन इन्जिनियरिङ कर्पोरेसनले सात अर्ब ३४ करोड २१ लाख चार हजार ७३४ रुपैयाँमा ठेक्का लिएको थियो । सिद्धार्थ राजमार्ग भएर साना–ठूला दैनिक एक हजारभन्दा बढी सवारी ओहोरदोहोर गर्छन् ।
