१६० केजी गाँजासहित भीमफेदीबाट एकजना पक्राउ

मकवानपुर प्रहरीले १६० किलो लागुऔषध गाँजा र गाँजा बोक्न प्रयोग भएको बोलेरो गाडीसहित एकजनालाई पक्राउ गरेको छ।

पक्राउ पर्नेमा गोरखाको भीमसेन थापा गाउँपालिका– ६ (साबिककाे असराङ गाउँपालिका- १) बस्ने २८ वर्षका अमिर मियाँ रहेकाे मकवानपुर प्रहरीले जनाएको छ। मकवानपुर प्रहरी प्रवक्ता डिएसपी श्यामु अर्यालका अनुसार मियाँलाई बुधबार बिहान पौने ४ बजे मकवानपुरको भीमफेदी गाउँपालिका– २ स्थित भैँसे चेकप्वाइन्टबाट नियन्त्रणमा लिइएको हो।

भैँसे चेकप्वाइन्टस्थित त्रिभुवन राजपथ सडकखण्डमा पालुङबाट हेटौँडातर्फ आउँदै गरेको प्र.न. ३–०१–०२३ च. ८०४७ नम्बरको बोलेरो गाडीलाई रोकी चेकजाँच गर्दा उक्त गाडीमा राखिएको खाली क्रेटमा लुकाइछिपाई ल्याइएको अवस्थामा ३० पोकामा रहेको १६० केजी लागुऔषध गाँजा बरामद भएको हो।

बोलेरो गाडीका चालक मियाँलाई जिल्ला प्रहरी कार्यालमा राखी थप अनुसन्धान भइरहेको प्रवक्ता अर्यालले जानकारी दिए।