आन्तरिक पर्यटकको रोजाइमा से–फोक्सुन्डाे

हाल डोल्पाको तापक्रम निरन्तर घटे पनि नीलो हीराका रूपमा परिचित देशको सबैभन्दा गहिरो से–फोक्सुन्डाे तालमा आन्तरिक एवं बाह्य पर्यटकको आगमन जारी  छ । से–फोक्सुन्डाे राष्ट्रिय निकुञ्जका प्रमुख संरक्षण अधिकृत नुरेन्द्र अर्यालका अनुसार गत साउनदेखि कात्तिकसम्ममा स्वदेशी र विदेशी गरी एक हजार ६३२ पर्यटक फोक्सुन्डाे ताल क्षेत्रमा आएका छन् । बाह्य पर्यटकको तुलनामा आन्तरिक पर्यटक आउने क्रम जारी छ। 

बितेका पाँच महिनामा दक्षिण एसियाली क्षेत्रीय सहयोग संगठन सार्क राष्ट्र र अन्य राष्ट्रका गरी ३२६ जना पर्यटकले से–फोक्सुन्डाे घुमेका र त्यसबाट रु. १० लाख ५३ हजार राजस्व संकलन  भएकोे उनले बताए। चालू आर्थिक वर्षको सुरुदेखि कात्तिकसम्म वन पैदावार बिक्री, पर्यापर्यटन, दण्डसजायलगायत शीर्षकबाट रु. ६५ लाख ७० हजार ६८८ राजस्व संकलन भएको निकुञ्जले जनाएको छ।

फोक्सुन्डाे ताल, त्रिपुरासुन्दरी मन्दिर, से–गुम्बा, धो तरापजस्ता सुन्दर धार्मिक तथा पर्यटकीय गन्तव्य डोल्पामै पर्ने भएकाले  केही वर्षयता आन्तरिक पर्यटकको संख्या बढ्दै गएको त्रिपुरासुन्दरी नगरपालिका– १ का लक्ष्मण देवकोटाले बताए । नेपालगन्ज–डोल्पा उडान नियमित गरेमा, भेरी करिडोरको सुधार तथा सुविधायुक्त होटेलको व्यवस्था भएमा पर्यटकको संख्या उल्लेख्य मात्रामा वृद्धि हुने उनी बताउँछन्।

व्यापार, व्यवसाय प्रवर्द्धनका हिसाबमा डोल्पालीलाई विदेशीभन्दा  स्वदेशी पर्यटक आउँदा फाइदा हुने सदरमुकाम दुनैका होटेल व्यवसायीहरू बताउँछन्। नेपालगन्ज–सुर्खेत–जाजरकोट–रुकुम हुँदै मोटरसाइकल र गाडीमा सजिलै दुनैसम्म पुग्न सकिने भएकाले पनि विमानमा भन्दा अघिकांश पर्यटक मोटरसाइकल चढेर यहाँ आउने गरेका छन्।