यू–१९ महिला टी–२० विश्वकप छनोट : नेपालको लगातार दोस्रो जित

आइसिसी यू–१९ महिला टी–२० विश्वकप एसिया छनोटमा नेपालले लगातार दोस्रो जित हासिल गरेको छ। संयुक्त अरब इमिरेट्स (युएई)को अजमानस्थित द सेभेन रंगशालामा बिहीबार कुवेतलाई १०८ रनको फराकिलो अन्तरले पराजित गर्दै नेपालले दोस्रो जित हासिल गरेको हो।

टस जितेर पहिला ब्याटिङ गरेको नेपालले कुवेतलाई जितका लागि १३१ रनको लक्ष्य प्रस्तुत गरेको थियो। जवाफी ब्याटिङमा उत्रिएको कुवेत १३ ओभरमा सबै विकेट गुमाएर २२ रनमा समेटियो।

कुवेतका लागि कप्तान जिफा जिलानीले सर्वाधिक १२ रन बनाइन्। उनले १७ बलमा दुई चौका प्रहार गर्दै १२ रन बनाएकी हुन्। कप्तान जिलानीबाहेक अन्य खेलाडीले दोहोरो अंकको रन बनाउन सकेनन्। आयशा इकबाल पेवेकरले तीन बलमा दुई रन बनाएर आउट भइन्। साराह जसवीले १२ बलमा चार रन बनाइन् भने जिनिया अफरोज र स्वातिबा कुलदीपसिंह परमारले समान एक–एक रन बनाए।

क्यान्डिस डायस, रेलिन मारिया डी सुजा, ईशान्वी मोहन सिंह, पर्ल सेरेना साइमन, खादिजा जाहिर हुसेन र अमिषा राम ओलाचेरी शून्य रनमा आउट भए।

नेपालका लागि रचनाकुमारी चौधरी र सीमा केसीले समान दुई–दुई विकेट लिए। त्यस्तै, कप्तान पूजा महतो, कृश्मा गुरुङ, मनीषा कुमारी उपाध्यायले समान एक–एक विकेट लिए। यो खेलमा कुवेतले अतिरिक्त दुई रन पायो।

त्यसअघि नेपालले निर्धारित २० ओभरमा आठ विकेट गुमाएर १३० रन बनाएको थियो। नेपालका लागि कप्तान पूजा महतोले सर्वाधिक ३४ रन बनाइन्। उनले ३८ बलमा चार चौका प्रहार गर्दै सर्वाधिक ३४ रन बनाएकी हुन्।

साना प्रवीणले १८ बलमा २५ रन बनाइन्। उनले सो क्रममा पाँच चौका प्रहार गरिन्। ज्योत्सिन्का मरासिनीले १८ बलमा एक चौकाको मद्दतले २३ रन बनाइन्। नेपालका लागि सावित्री धामी र सोनी पाख्रिनले समान ६–६ रन बनाए भने सीमा केसीले चार रन बनाएकी थिइन्।

नेपालका लागि कृश्मा गुरुङले एक रनको योगदान दिइन् भने रचनाकुमारी चौधरी र रिया शर्माले एक रन पनि जोड्न सकेनन्। नेपालले अतिरिक्त १६ रन प्राप्त गरेको थियो।

कुवेतका लागि आयशा इकबाल पेवेकरले दुई र जिफा जिलानी र अमिषाराम ओलाचेरीले समान एक–एक विकेट लिएका थिए। यससँगै कुवेतले लगातार दोस्रो हार व्यहोरेको छ। बुधबार युएईले १०६ रनको अन्तरले कुवेतलाई पराजित गरेको थियो।

यो जितसँगै नेपालले अब शनिबार युएईसँग खेल्नेछ। छनोट खेलमा आयोजक संयुक्त अरब इमिरेट्ससहित नेपाल, कुवेत र थाइल्यान्ड सहभागी छन्। सहभागी चार टोलीमध्ये शीर्ष स्थान हासिल गर्ने टोली सन् २०२५ मा मलेसियामा हुने विश्वकपमा छनोट हुनेछ। रासस