खेलकुद प्रिन्ट संस्करण

पेरिस ओलम्पिक २०२४ : इटालियन बक्सरले खेल छाडिन् ४६ सेकेन्डमै

कारिनीले विपक्षी बक्सरको लैंगिक विषय उठाउँदै रिङमा आफू महिला नभएर पुरुष खेलाडीविरुद्ध प्रतिस्पर्धा गरेको प्रतिक्रिया दिइन् 

पेरिस ओलम्पिकअन्तर्गत बक्सिङ इभेन्टमा कारिनीले अल्जेरियाकी इमान खालिफसँग प्रतिस्पर्धा गरेकी हुन् । खालिफले क्वार्टरफाइनल स्थान पक्का गर्न एक मिनेट पनि खर्चनुपरेन । ३० सेकेन्डमा खालिफले अनुहारमा मुक्का हानेपछि कारिनी आफ्नो हेडगियर सम्हाल्न प्रशिक्षककहाँ पुगेकी थिइन् । खेल सुरु भएको केही सेकेन्डमै उनी आफ्नो कुनामा फर्किन् । तत्कालै खेल त्याग गरेको संकेत गरिन् । रेफ्रीले खालिफलाई विजेता घोषित गरेका थिए । 

कारिनीले विपक्षी बक्सरको लैंगिक विषय उठाएकी छिन् । उनले रिङमा आफू महिला नभएर पुरुष खेलाडीविरुद्ध प्रतिस्पर्धा गरेको प्रतिक्रिया दिइन् । ‘रिङमा म एक महिला नभएर पुरुषविरुद्ध खेलिरहेकी थिएँ,’ निराश हुँदै कारिनीले भनिन्, ‘पुरुषको मुक्का महिला खेलाडीले कहाँ सामना गर्न सकिन्छ ? म आफ्नो ज्यान बचाउन पछि हटेकी हुँ ।’ 

अन्तर्राष्ट्रिय बक्सिङ महासंघको प्रतिबन्धका बाबजुत पेरिस ओलम्पिकमा खालिफले भाग लिएकी छिन् । पेरिसमा उनीसँगै थप एक महिला खेलाडीले महासंघको मापदण्ड पूरा गरेकी छैनन् । मापदण्ड पूरा नहुँदा उनले यसै वर्ष भएको महिला बक्सिङको विश्व च्याम्पियनसिपमा भाग लिन नै पाइनन् । तर, पेरिस ओलम्पिक आयोजकले खालिफलाई खेल्न अनुमति दियो । महासंघले खालिफको शरीरमा टेस्टोस्टेरोनको मात्रा बढेका कारण भारतमा भएको विश्व च्याम्पियनसिप खेल्न दिएको थिएन । टेस्टोस्टेरोनको हर्मोन पुरुषमा पाइन्छ । 

खालिफले करिअरमा ५० मध्ये नौ खेल मात्र गुमाएकी छिन् । उनले आफू स्वर्ण पदक जित्नका लागि पेरिस आएको र सबै खेलाडीसँग लड्ने बताइन् । खेलको एक दिनअघि अल्जेरियाको ओलम्पिक कमिटीले उनीमाथि लागेको आरोपलाई निराधार भएको जनाएको थियो । 

रिङमा समानता नभएको आरोप
इटालियन बक्सर कारिनीले रिङ लैंगिक समानता नभएको आरोप लगाएकी छिन् । ‘म रिङमा डराएकी थिइन् । उसले प्रहार गर्दा पनि मलाई डर लागेन । मैले खेल समाप्त गर्न बाध्य भएँ, किनभने म रिङमा लैंगिक लडाइँ लड्न असमर्थ थिएँ,’ उनले भनिन् । इटालीकी प्रधानमन्त्री जर्जिया मेलोनीले कारिनीलाई साथ दिइन् । ‘समानताका आधारमा प्रतिस्पर्धाको अर्थ हुन्छ । मेरो विचारमा यो खेल समानताको आधारमा थिएन,’ उनले भनिन् । 

कारिनीले विपक्षीको प्रहार सामान्य नहुँदा लैंगिक भेदभाव विषय उठान गर्न बाध्य भएको बताइन् । ‘म रोकिएँ । मैले आफैँलाई रोक्न भनेँ । यो मेरो जीवनभरका लागि यादगार खेल हुन सक्थ्यो, तर त्यसवेला मैले आफ्नो ज्यान जोगाउनुपरेको थियो,’ उनले भनिन्, ‘यसपटक सबै कुराको अन्त्य हुनैपर्छ । मैले खेल समाप्त गरेँ, किनभने म एक पुरुष खेलाडीविरुद्ध लडिरहेकी थिएँ ।’ 

ओलम्पिकमा मापदण्ड पूरा
अन्तर्राष्ट्रिय ओलम्पिक कमिटीले सबै बक्सरले प्रतियोगितामा भाग लिन र प्रवेशका लागि योग्यता मापदण्ड पूरा गरेको जनाएको छ । ‘यी खेलाडीले यसअघि पनि धेरै प्रतियोगितामा खेलिसकेका छन् । उनीहरू अचानक यहाँ आएका होइनन् । तिनीहरूले टोकियोमा पनि खेलेका छन्,’ आइओसीका प्रवक्ता मार्क एडम्सले भने । अन्तर्राष्ट्रिय बक्सिङ महासंघका अध्यक्ष ओमर क्रेमलेभ रुसका कारण ओलम्पिक कमिटीले बक्सिङ महासंघको निर्णय नमानेको तर्क राखेका छन् । विश्व च्याम्पियनसिपमा बक्सिङ महासंघको निर्णय चल्ने भए पनि ओलम्पिकमा अन्तर्राष्ट्रिय ओलम्पिक कमिटीले आफ्नै निर्णयमा खेल गराउँछ । 

यता, अल्जेरियन मिडियाले खालिफको उच्च टेस्टोस्टेरोनका कारण विश्व च्याम्पियनसिपबाट हटाएको दाबी झुटो भएको जनाएका छन् । खालिफले आफूमाथि षड्यन्त्र भएको बताएकी छिन् । ‘केही देशहरू अल्जेरियाले स्वर्ण पदक जितेको चाहँदैनन् । यो ठूलो षड्यन्त्र हो । यसमा हामी चुप लागेर बस्दैनौँ,’ खालिफले भनिन् ।