सरकार तथा निजी क्षेत्रले नेपालको पूर्वाधारमा लगानी बढाउन एसियाली पूर्वाधार लगानी बैंक (एआइआइबी)लाई आग्रह गरेको छ । एआइआइबीका प्रतिनिधिसँग भएको छुट्टाछुट्टै भेटमा नेपाल पक्षले यहाँको ऊर्जा, यातायात तथा पर्यटनलगायतको पूर्वाधारमा लगानी बढाउन आग्रह गरेका हुन् ।
अहिले एआइआइबी सञ्चालक समितिका सदस्य आरएमपी रथनायकेको नेतृत्व प्रतिनिधिमण्डल नेपाल भ्रमणमा रहेको छ । प्रतिनिधिमण्डलले मंगलबार नेपाल राष्ट्र बैंक, नेपाल विद्युत् प्र्राधिकरण, नेपाल उद्योग वाणिज्य महासंघलगायतका सरकारी एवं गैरसरकारी संघ–संस्थासँग छलफल गरेको छ । यसअघि प्रतिनिधिमण्डलले प्र्रधानमन्त्री पुष्पकमल दाहाल प्रचण्ड र अर्थमन्त्री वर्षमान पुनलाई समेत भेटवार्ता गरिसकेको छ ।
छुट्टाछुट्टै भेटवार्तामा उनीहरूले नेपालमा लगानी बढाउन आग्रह गरेका थिए । एआइआइबीका प्रतिनिधिमण्डलसँग मंगलबार भएको भेटवार्तामा राष्ट्र बैंकका गभर्नर महाप्रसाद अधिकारीले आन्तरिक स्रोत अपुग भएको भन्दै नेपालको पूर्वाधारमा लगानी बढाउन आग्रह गरे । उनले जलविद्युत्, प्रसारणलाइनलगायत पूर्वाधार क्षेत्रमा लगानी बढाउन जोड दिए ।
नेपाल विद्युत् प्राधिकरणले विद्युत् पूर्वाधार संरचना सुधार तथा विस्तारका परियोजनामा लगानी बढाउन एआइआइबी)लाई आग्रह गर्यो । एआइआइबीको भेटमा प्राधिकरणका कार्यकारी निर्देशक कुलमान घिसिङले विद्युत् प्रसारण र वितरणतर्फका पूर्वाधार सुधार तथा विस्तारमा सस्तो ब्याजदरमा लगानी बढाउन आग्रह गरे ।
नेपालको ऊर्जा क्षेत्रको रूपरेखा तथा लगानी आवश्यकतासम्बन्धी जानकारी प्रतिनिधिमण्डललाई गराउँदै कार्यकारी निर्देशक घिसिङले पर्याप्त, भरपर्दो, गुणस्तरीय र सुरक्षित विद्युत् आपूर्ति, छिमेकी देशहरूसँगको विद्युत् व्यापार विस्तारका लागि उत्पादन, प्रसारण र वितरणतर्फका संरचना निर्माण गर्न ठूलो लगानी आवश्यक रहेको बताए ।
‘ऊर्जा मन्त्रालयले अगाडि बढाएको सन् २०३५ सम्मको ऊर्जा क्षेत्रको मार्गचित्र कार्यान्वयनका लागि विद्युत् उत्पादन, प्रसारण र वितरणतर्फका आयोजनाका लागि झन्डै ६० अर्ब अमेरिकी डलर (निजी क्षेत्रलाईसहित) लगानी चाहिन्छ, यसका लागि एआइआइबीजस्ता बहुपक्षीय निकायबाट सस्तो ब्याजदरमा सहुलितपूर्ण ऋण आवश्यक छ,’ घिसिङले भने ।
प्रतिनिधिमण्डलले ऊर्जा क्षेत्रका लागि आवश्यक पर्ने लगानी गर्न बैंक इच्छुक रहेको बताएको थियो । प्रतिनिधिमण्डलबाट हाल एआइआइबीको लगानीमा निर्माणाधीन आयोजनाहरूको प्रगति, वातावरणीय तथा सामाजिक सुरक्षणका विषय, ऊर्जा क्षेत्रको पुर्नर्संरचना, विद्युत् निर्यातका लागि बजार सुनिश्चितालगायतका विषयमा जिज्ञासा राखिएको थियो ।
एआइआइबी प्रतिनिधिमण्डल र महासंघबीच मंगलबार नै भेटवार्ता भयो । उक्त अवसरमा महासंघका अध्यक्ष चन्द्र ढकालले नेपालमा लगानी बढाउन आग्रह गरे । उनले नेपालमा पूर्वाधार, ऊर्जा, पर्यटन र कृषिमा लगानीको सम्भावना रहेको उल्लेख गर्दै ती क्षेत्रमा लगानी बढाउन आग्रह गरे । सो अवसरमा एआइआइबीले यातायात, ऊर्जा र सहरी विकासलगायतका क्षेत्रमा कसरी बढी योगदान दिन सक्छ भन्ने विषयमा पनि छलफल भएको थियो । ढकालले नेपालको आर्थिक विकासमा निजी क्षेत्रले अगुवाइ गर्दै आएको र आगामी दिनमा पनि निरन्तरता दिने बताए ।
