कांग्रेस प्रवक्ता डा. प्रकाशशरण महतले कांग्रेस–माओवादी गठबन्धन तोडिनुमा प्रधानमन्त्री पुष्पकमल दाहाल प्रचण्ड नै भएको बताएका छन् ।
पार्टी मुख्यालय सानेपामा पत्रकार सम्मेलन गरेर डा. महतले तत्कालीन सत्तागठबन्धन टुट्नुमा कांग्रेस जिम्मेवार नरहेको बताए । उनले कांग्रेसकै कारण गठबन्धन टुटेको भन्ने प्रधानमन्त्रीको अभिव्यक्ति अरूलाई दोषारोपण गर्ने कुरा मात्र भएको जिकिर गरे ।
उनले कांग्रेसकै कारण सरकारले औसतभन्दा बढी उपलब्धि हासिल गर्न नसकेको भन्दै प्रधानमन्त्रीले झुटो र भ्रमपूर्ण अभिव्यक्ति दिएको पनि बताए । निवर्तमान अर्थमन्त्रीसमेत रहेका महतले कांग्रेसलाई दोषारोपण गर्ने गरी प्रधानमन्त्रीले अभिव्यक्ति दिएको जिकिर गरे ।
‘कांग्रेसको कारणले औसतभन्दा ज्यादा उपलब्धि भएन भनेर दोषारोपण गर्नु योभन्दा गलत कुरा, झुटो कुरा, भ्रम छर्ने कुरा हुनै सक्दैन,’ उनले भने, ‘म यो कुरा ठोकुवाका साथ भन्छु । हामो उपस्थितिले अहिलेको परिस्थितिमा गुणात्मक परिवर्तन आएको हो ।’
मुलुकको अर्थतन्त्र सुधार्न आफूले प्रस्तुत गरेको मार्गचित्र वर्तमान सरकारले छोडे मुलुकको अर्थतन्त्र फेरि अप्ठ्यारोमा पर्ने उनको भनाइ थियो ।