- वि.सं २o८o फाल्गुण २४ बिहीबार
काठमाडौं महानगरपालिकाको सामाजिक विकास विभागले सरकारी र निजी गरेर २० वटा क्याम्पसहरूसँग सीपमूलक तालिम सञ्चालन स्थलका लागि सहमतिपत्रमा हस्ताक्षर गरेको छ।
विभागका निमित्त प्रमुख बिमला कोइराला र सम्बन्धित कलेजका पदाधिकारीहरूले बिहीबार सम्झौतामा हस्ताक्षर गरेका हुन्। १५ हजार व्यक्तिलाई तालिम दिने र ५ हजारजनालाई प्रत्यक्ष रोजगारीमा आबद्ध गराउने कार्यक्रमको लक्ष्य छ।
महानगरपालिकाले चालू आर्थिक वर्षदेखि १० वटा महानगर गौरव योजना कार्यान्वयनमा ल्याएको छ। यीमध्ये ‘रोजगारी र आय वृद्धि, काठमाडौंको समृद्धि’ कार्यक्रमअन्तर्गत रोजगारमूलक सीप विकास तालिम सञ्चालनका लागि महानगरले सम्झौता गरेको हो।
सम्झौताबमोजिम कलेजहरूले तालिमका लागि कक्षाकोठा (स्थान) र प्रयोगशाला निःशुल्क उपलब्ध गराउनेछन्। प्रशिक्षक तथा जनशक्ति र मर्मत-सम्भार खर्च महानगरपालिकाले उपलब्ध गराउनेछ।
तालिममा सहभागिताका लागि करिब १० हजार आवेदन प्राप्त भइसकेको बताइएको छ। महानगरका अनुसार सूचना प्रविधिमा आधारित तालिममा धेरै व्यक्तिहरूको चासो छ।
