- वि.सं २o८o मङ्सिर १६ शनिबार
राष्ट्रिय फुटबल टोलीका पूर्वप्रशिक्षक भीम थापाको निधन भएको छ । ७५ वर्षे थापाको बिहीबार राति हृदयाघातका कारण निधन भएको अखिल नेपाल फुटबल संघ (एन्फा)ले जनाएको छ ।
एन्फाको पूर्वटेक्निकल इाइरेक्टरसमेत रहेका थापा नेपाली राष्ट्रिय फुटबल टोलीको पहिलो पुस्ताका खेलाडी हुन् । सन् १९७१ मा जापानमा भएको एसियन च्याम्पियनसिपमा उनले नेपाली टोलीबाट प्रतिनिधित्व गरेका थिए । थापाले घरेलु फुटबलमा न्युरोड टिम (एनआरटी), ठमेल र महावीर क्लबबाट व्यावसायिक फुटबल खेलेका थिए ।
खेल जीवनमा पनि उनी एन्फाको सहायक महासचिव बनेका थिए । एन्फा एकेडेमीको मुख्य योजनाकारमध्ये थापा थिए । उनले पटक–पटक राष्ट्रिय फुटबल टोलीको प्रशिक्षण सम्हालेका थिए । उनलाई नेपाल खेलकुद पत्रकार मञ्चले २०७० सालमा लाइभ टाइम एचिभमेन्ट अवार्डबाट सम्मानित गरेको थियो ।
