- वि.सं २o८१ बैशाख २३ आइतबार
कांग्रेस केन्द्रीय सदस्य डा. शेखर कोइरालाले कोशी प्रदेश सरकारका कारण केन्द्रीय गठबन्धनमा कुनै असर नपर्ने बताएका छन् । केन्द्रको वर्तमान सत्तागठबन्धन निरन्तर रहने बताएका उनले गठबन्धन सरकार पूर्ण कार्यकालसम्म चल्ने जिकिर गरे ।
विराटनगरको शाेभित भवनमा आज आयोजित शुभकामना आदान–प्रदान कार्यक्रममा उनले विकासमा कोशी प्रदेश पछाडि पर्नुको कारण राजनीतिक अस्थिरता भएको बताए । उनले राजनीतिक दलले समाजलाई जोड्न महत्वपूर्ण भूमिका निर्वाह गर्नुपर्ने धारणा राखे ।
उनले कांग्रेस पार्टीभित्र एकता अनिवार्य रहेको भन्दै अन्य राजनीतिक पार्टीबाट समायोजन भएर आउने राजनीतिक दलका नेता र कार्यकर्तालाई कांग्रेसले संरक्षणसहित अवसर पनि दिने बताए ।
फरक प्रसंगमा उनले मुलुकमा सुशासनका निम्ति भ्रष्टाचार र दण्डहीनताको समूल अन्त्य हुनुपर्ने धारणा राखे । देश कुनै पनि द्वन्द्वमा फस्न नहुने भन्दै कोइरालाले नेपाल एसियाको गरिब देश हुनुमा राजनीतिक दल र नेता प्रमुख कारक भएको दाबी गरे । (रासस)
