भेपमार्फत सुन तस्करी प्रकरणको दोस्रो चरणको अनुसन्धान : राहुल महरासहित चारजनाविरुद्ध मुद्दा चलाउन सिफारिस

बहुचर्चित विद्युतीय चुरोट (भेप)भित्र लुकाई गरिएको सुन तस्करीसँग सम्बन्धित दोस्रो चरणको अनुसन्धान सकेर नेपाल प्रहरीको केन्द्रीय अनुसन्धान ब्यूरो (सिआइबी)ले सरकारी वकिल कार्यालयमा प्रतिवेदन पेस गरेको छ । प्रहरीले प्रतिवेदनमा सुन तस्करीमा पूर्वसभामुख कृष्णबहादुर महराविरुद्ध मुद्दा चलाउनुनपर्ने निष्कर्ष निकालेको छ । तर, उनका छोरा राहुलसहित चारजनाविरुद्ध भने मुद्दा चलाउन सिफारिस छ ।

घटनामा नयाँ पात्रको नामसमेत जोडिएपछि प्रहरीले दोस्रो चरण पुनः अनुसन्धान थालेको थियो । सोही क्रममा राहुल गत १३ भदौमा पक्राउ परेका थिए । प्रहरीले पूरक अभियोजनमा राहुलसहित अन्य चारजनाविरुद्ध मुद्दा चलाउन सिफारिस गरेको हो । अन्य प्रतिवादी लोकेन्द्र पौडेल, तिब्बती मूलका बेल्जियम नागरिक दावा छिरिङ र चिनियाँ नागरिक ली हानसोङ छन् । उनीहरूविरुद्ध आठ करोड ५७ लाख रुपैयाँको बिगो दाबी गरिएको छ । 

भेपमा लुकाई सुन तस्करी भएको घटनामा सिआइबी अनुसन्धानरत थियो । यो सकेर प्रतिवेदन सरकारी वकिल कार्यालयमा पेस गरिएको छ । चारजनालाई प्रतिवादी बनाइएको छ । उनीहरूविरुद्ध आठ करोड ५७ लाख रुपैयाँको बिगो दाबी गरिएको छ ।

एसएसपी दिनेश आचार्य

सिआइबीका एसएसपी दिनेश आचार्यले भेपमा गरिएको सुन तस्करीको अनुसन्धान सकेर प्रतिवेदन सरकारी वकिल कार्यालयमा पेस गरिएको बताए । ‘भेपमा लुकाई सुन तस्करी भएको घटनामा सिआइबी अनुसन्धानरत थियो । यो सकेर प्रतिवेदन सरकारी वकिल कार्यालयमा पेस गरिएको छ । चारजनालाई प्रतिवादी बनाइएको छ । उनीहरूविरुद्ध आठ करोड ५७ लाख रुपैयाँको बिगो दाबी गरिएको छ,’ उनले भने । 

घटनामा जोडिएका दावाजिन वाङसहितका ६ जना चिनियाँ नागरिकलाई भने भेट भएको बखत पक्राउ गर्ने र आवश्यक मुद्दा चलाउने गरी प्रतिवेदन बनाइएको छ । सिआइबीले उनीहरूविरुद्ध सुनको अवैध चोरी–पैठारी र संगठित अपराधअन्तर्गत म्याद थप गरे घटनाको अनुसन्धान गरेको थियो । 

सिआइबीले पहिलो चरणको अनुसन्धान सकेर गत २७ असारमा नै अनुसन्धान प्रतिवेदन सरकारी वकिल कार्यालयमा बुझाएको थियो । सोही क्रममा पूर्वसभामुख महरा र उनका छोरा राहुलसमेत जोडिएका समाचार सार्वजनिक भएपछि सिआइबीले घटनाको दोस्रोपटक पुनः अनुसन्धान थालेको थियो । 

 कृष्णबहादुर महराविरुद्ध मुद्दा चलाउनुनपर्ने सिआइबीको निष्कर्ष
पूर्वसभामुख कृष्णबहादुरले भन्सारमा राखिएको सुन छुटाउन भन्सारका कर्मचारीलाई पटक–पटक फोन गरेको आरोप थियो । उनका छोरा राहुलले सुन छुटाउन भन्सारका कर्मचारीलाई दबाब दिने तथा अभियुक्तलाई सहयोग गरेको आरोप लागेको थियो । घटनामा संलग्न रहेको देखिएकै आधारमा राहुललाई मुद्दामा प्रतिवादी बनाइएको हो । 

गत १० पुसमा फ्लाई दुबईको जहाज हुँदै अन्तर्राष्ट्रिय विमानस्थल झरेका चिनियाँ नागरिक ली हानसोङ विद्युतीय चुरोटसहित पक्राउ परेका थिए । उनले जहाजबाट दुईवटा सुटकेसमा लुकाई ७३ कार्टुनभित्र सात सय ३० थान भेप ल्याएका थिए । शंका लागेपछि उक्त भेप विमानस्थलस्थित भन्सार कार्यालयको स्टोरमा राखिएको थियो । 

भेपभित्र सुन रहेको खुलेपछि भन्सारकै अधिकृत रेवन्त खड्कासहितका कर्मचारीको मिलेमतोमा चोरी गरिएको थियो । र, उक्त सुन बिक्री गरेका थिए । भेप चोरी भएको खुलेपछि घटनाको अनुसन्धान सिआइबीले गरेको थियो । अनुसन्धानका क्रममा भेपभित्र साढे नौ किलो सुन रहेको खुलेको थियो ।