एसिया कप : नेपाल फराकिलो अन्तरले पराजित

१६औँ एसिया कप क्रिकेट प्रतियोगिताको बुधबार उद्घाटन खेलमा नेपाल दुई सय ३८ रनको विशाल अन्तरले पराजित भएको छ । एकदिवसीय क्रिकेट इतिहासमै नेपालको हार १६औँ ठूलो जितअन्तर हो । यो नेपालको एकदिवसीय खेलको इतिहासकै सबैभन्दा खराब हारसमेत हो । यसअघि नेपाल वेस्ट इन्डिजसँग एक सय एक रनले पराजित भएको थियो । पञ्जाबको मुल्तान रंगशालामा आयोजक र विश्वकै एक नम्बर एकदिवसीय टोली पाकिस्तानले ५० ओभरमा ६ विकेट गुमाएर तीन सय ४३ रन बनाएको थियो । 

नेपालविरुद्ध कुनै पनि टोलीले एकदिवसीय खेलमा बनाएको यो उच्च योगफल हो । एकदिवसीय विश्वकप ग्लोबल छनोटमा वेस्ट इन्डिजले नेपालविरुद्ध ३ सय ३९ रन जोडेको थियो । नेपालले आफ्नो ५० ओभरको फम्र्याटमा कीर्तिमानी लक्ष्य पछ्याउँदा २३.४ ओभरमा १ सय ४ रनमा अलआउट भयो । नेपालका लागि सोमपाल कामीले सर्वाधिक २८ रन बनाए । उनले ४६ बलमा चार चौका प्रहार गरेका थिए । वर्तमान समयकै विश्वका तीव्र गतिका बलर साहिन साह अफ्रिदीको घातक बलिङ सामना गर्न नसक्दा नेपाल इनिङ्सको १.४ ओभरमा १४–३ को दयनीय अवस्थामा थियो । त्यसपछि आरिफ शेख र सोमपालले चौथो विकेटका लागि ५९ रनको साझेदारी गरे । दुवैले ७८ बलको सामना गरेका थिए । 

१४.४ ओभरमा हरिस रौफले आरिफलाई क्लिन बोल्ड गरे । उनले ३८ बलमा पाँच चौका प्रहार गरी २६ रन बनाए । सोमपाल र आरिफबाहेक अन्य कुनै पनि नेपाली ब्याट्सम्यानले गतिलो योगदान दिन सकेनन् । यसअघि अफ्रिदीले आफ्नो पहिलो ओभरमै दुई विकेट लिएका थिए । ओपनर कुशलले अफ्रिदीको पहिलो ओभरमा दुई चौका प्रहार गरेका थिए । तर, कुशलले अनावश्यक सट खेल्दा आफ्नो विकेट गुमाए । कप्तान रोहितकुमार पौडेलले सामना गरेको पहिलो बलमै गोल्डेन डट आउट भए ।  नेपालका गुलसन झा १३ रन, दीपेन्द्रसिंह ऐरी तीन रन, कुशल मल्लले ६ रन बनाए । पूर्वकप्तान सन्दीप लामिछाने र ललित राजवंशी डक आउट भए । अन्तिममा करण केसी सात रनमा नट आउट रहे । पाकिस्तानका लागि सादब खानले ६.४ ओभरमा २७ रन खर्चेर चार विकेट लिए । अफ्रिदीले पाँच ओभरमा २७ रन खर्चेर २ विकेट लिए । 

 २ सय १४ रनको साझेदारी
पहिलोपटक एकदिवसीय खेलमा नेपालको सामना गरेको पाकिस्तानका अनुभवी चार ब्याट्सम्यान १२४ रनको अवस्थामा पेभेलियन फर्कंदा संकटमा थियो । कप्तान बाबर र इफ्तिखारले पाँचौँ विकेटका लागि अविस्मरणीय साझेदारी गरे । दुवैले पाकिस्तानलाई १२४–४ बाट ३३८/५ को बलियो स्थितिमा पुर्‍याए । उनीहरूका कारण नेपालले आफ्नो हातबाट खेल गुमाउन बाध्य भयो । 

यसअघि नेपालले पाकिस्तानमाथि पूर्ण रूपले नियन्त्रण राखेको थियो । दुवै ब्याट्सम्यानले २७.५ देखि ४९.४ ओभरसम्म साझेदारीका क्रममा दुवैले एक सय ३१ बलमा प्रतिओभर ९.७७ रन बटुलेका थिए । सोमपालले पाँचौँ विकेटका लागि भएको २१४ रनको साझेदारी तोड्न सफल भए । तर, नेपालका लागि निकै ढिलो भइसकेको थियो । सोमपालले सन्दीप जोराबाट बाबरलाई क्याचआउट गराएका हुन् ।

बाबरले एक सय ५१ रन बनाउन एक सय ३१ बलमा १४ चौका र ४ छक्का प्रहार गरेका थिए । यो उनको दोस्रो सर्वाधिक एकदिवसीय व्यक्तिगत रन हो । इफ्तिखार ११ चौका र चार छक्काको सहयोगमा एक सय ९ रनमा अविजित रहे । बाबर र मोहमद रिजवानबीच तेस्रो विकेटका लागि ८६ रनको साझेदारी भयो । पहिलोपटक एसिया कपमा सहभागी नेपालले एकदिवसीय क्रिकेटकै नम्बर एक राष्ट्र पाकिस्तानलाई पहिलो पावर प्लेमा रोकेको थियो । 

 २४० रनमा रोक्ने लक्ष्य थियो
रोहितकुमार पौडेल, कप्तान, नेपाल
विश्वकै नम्बर एक राष्ट्र पाकिस्तानलाई दुई सय ४० रनमा रोक्ने योजना थियो । हामीले सुरुवात निकै राम्रो ग¥यौँ । त्यसलाई निरन्तरता दिन सकेनौँ । खेलको मध्यक्रममा बलरले विकेट लिने बल नै फ्याँक्न सकेनन् । यसको श्रेय बाबर र उनको टोलीलाई जान्छ । बाबरले नै पाकिस्तानको इनिङ्स अगाडि बढाए । यस खेलबाट हामीले धेरै पक्ष सिक्ने अवसर पायौँ । प्रत्येक खेलमा हामीले केही न केही सिकिरहेका छौँ । हामीले अझै डेथ ओभरमा राम्रो गर्नुपर्छ । ब्याटिङमा हामीले राम्रो गर्न सकेनौँ । हामीले हरेक बलमा राम्रो गर्न प्रयास गर्नुपर्छ । 

 साझेदारी नै जितको आधार बन्यो
बाबर अजाम, कप्तान, पाकिस्तान
नेपाली बलरले सुरुवातमा हामीमाथि दबाब राखे । व्यक्तिगत रूपमै केही बलमा मसमेत समस्यामा परेको थिएँ । बिस्तारै रिजवान र इफ्तिखारबीच साझेदारी भयो । साझेदारीका क्रममा विपक्षीको कमजोरीअनुसार योजना बनायौँ । रिजवानले मलाई आत्मविश्वास दिलाए । आज हामीले फरक क्रिकेट खेल्यौँ । इफ्तिखारले मलाई राम्रो साथ दिए । दुवैले सामान्य खेल खेल्ने योजना बनायौँ । जसका कारण हामीले पूरै समय खेल्यौँ । यो खेल हामीलाई विश्वकपअघि राम्रो तयारी भएको छ । भारतसँग खेल्न आत्मविश्वास दिएको छ । हामी हरेक खेलमा शतप्रतिशत दिन्छौँ । हरेक खेल राम्रो गर्छौं । 

 ब्याटिङक्रम स्तब्ध भयो
पवन अग्रवाल, पूर्वकप्तान, नेपाल
हामीले पहिलो इनिङ्समा आशा गरेजस्तै पाकिस्तानलाई दबाबमा राख्यौँ । सुरुमै विकेट आयो । दुई विकेट लिएका पनि हौँ । बाबर आजमजस्तो विश्व नम्बर एकलाई दबाबमा राखेका थियौँ । एकदमै राम्रो थियो । उनीहरूले नै राम्रो गरे । बाबरले आफू एकदिवसीय खेलमा नम्बर एक हो भनेर प्रमाणित गरे । उसले अन्तिमसम्म टोलीलाई अगाडि बढाए । दोस्रो इनिङ्स स्तब्धपूर्ण रह्यो । उनीहरूको बलिङ राम्रो छ भन्ने थियो । आसिफ र कप्तान रोहित राम्रो बलमा आउट भए । सोमपाल र आरिफमा अनुभवी देखिएन । 

बाबरको कीर्तिमानी शतक
पाकिस्तानका कप्तान बाबर आजमले एकदिवसीय क्रिकेटमा कीर्तिमान राखेका छन् । उनले नेपालविरुद्धको खेलमा शतकीय इनिङ्स खेलेका हुन् । उनले आफ्नो एकदिवसीय करिअरकै १९औँ शतक पूरा गरेका हुन् । एक सय दुई इनिङ्समा १९ शतक प्रहार गर्ने उनी विश्वकै पहिलो ब्याट्सम्यान बनेका छन् । यसअघि दक्षिण अफ्रिकाका हसिम अमलाले एक सय चार इनिङ्समा १९ शतक बनाएका थिए । भारतका पूर्वकप्तान विराट कोहलीले एक सय २४ इनिङ्स एकदिवसीय खेलमा १९ शतक लगाएका थिए । 

५० ओभरको फम्र्याटमा कीर्तिमानी शतक पार गर्न बाबरले केवल एक सय नौ बल खेले । यसक्रममा उनले १० चौका प्रहार गरेका थिए । डेथ ओभरमा नेपाली बलरमाथि पूरै हावी भएका बाबरले व्यक्तिगत ५५ रनमा जीवनदान पाएका थिए । करण केसीले आफूले नै गरेको ओभरमा बाबरलाई कट एन्ड बोल्ड गर्न मिस गरे । एक जीवनदान प्राप्त गरेका बाबरले त्यसपछि आक्रामक रूपमा ब्याटिङ गरेका थिए । 

रिभ्यु लिने पहिलो नेपाली खेलाडी रोहित
एकदिवसीय क्रिकेटमा नेपालका लागि रिभ्यु लिने कप्तान रोहित पहिलो खेलाडी बनेका छन् । उनले पाकिस्तानमा बुधबारदेखि सुरु भएको १६औँ संस्करणको एसिया कपमा घरेलु टोलीविरुद्ध रिभ्यु लिएका हुन् । ओपनर कुशल आउट भएपछि क्रिजमा आएका उनले पहिलो ओभरमै रिभ्यु मागेका थिए । वर्तमान समयकै तीव्र गतिका बलर साहिनले ०.६ ओभरमा रोहितलाई एलबिडब्लू आउट गरेका थिए । एलबिडब्लू हुनुअघि रोहितले थर्ड अम्पायरसँग रिभ्यु मागेका थिए । तर, उनी सफल भएनन् । नेपालले पाकिस्तानविरुद्ध बलिङ गर्दा कुनै रिभ्यु लिएको थिएन । यसअघि नेपालले खेलेका ५२ एकदिवसीय खेलमा रिभ्यु उपलब्ध थिएन ।

गुल्सन सबैभन्दा खर्चिलो बलर
अन्तर्राष्ट्रिय क्रिकेट काउन्सिल (आइसिसी)ले एसिया कपमा प्रभाव पार्न सक्ने खेलाडीको सूचीमा राखेका गुल्सन झा पाकिस्तानविरुद्ध सर्वाधिक खर्चिलो भए । उनले केवल चार ओभरमा ३५ रन खर्चे । उनी विकेटविहीन भए । उनले प्रतिओभर ८.७५ रनमा बलिङ गरे । पाकिस्तानी ब्याट्सम्यानले गुल्सनविरुद्ध समान एक चौका र छक्का प्रहार गरे । नेपालका लागि फास्ट बलर सोमपाल कामीले दुई विकेट लिए । उनले १० ओभरमा दुई विकेट हात पार्न ८५ रन खर्चिए । सोमपालले सदाव खान र कप्तान बाबरको विकेट लिए । सोमपालको बलिङमा पाकिस्तानी खेलाडीले १० चौका र तीन छक्का प्रहार गरे । 

नेपालका लागि सन्दीप लामिछाने तेस्रो महँगा बलर भए । उनले १० ओभरमा ६९ रन खर्चेर एक विकेट हात पारे । उनले अघ सलमानको विकेट लिए । सन्दीपविरुद्ध पाकिस्तानी ब्याट्सम्यानले ६ चौका र दुई छक्का प्रहार गरे । ललित राजवंशीले पाकिस्तानी ब्याट्सम्यानविरुद्ध कसिलो बलिङ गरे । उनले १० ओभरमा ४८ रन मात्र दिए । उनले प्रतिओभर ४.१० ओभरमा बलिङ गरेका थिए । पाकिस्तानका ब्याट्सम्यानले ललित र कुशल भुर्तेलविरुद्ध मात्र छक्का प्रहार गर्न सकेनन् ।