जनप्रशासन क्याम्पसमा आर्थिक आयव्ययमै नसमेटी २० लाख हिनामिना

बल्खुस्थित जनप्रशासन क्याम्पसलाई जनप्रशासन केन्द्रीय विभागले ऋणमा दिएको रकम हिनामिना भएको छ । निमित्त विभागीय प्रमुख छँदा ०७६ फागुनमा हालका क्याम्पस प्रमुख हरिभक्त शाहीले क्याम्पसको खर्च व्यवस्थापनका लागि भन्दै विभागबाट २० लाख सापटी लिएका थिए । तर, सो रकम क्याम्पसको ०७६/७७ र ०७७/७८ को आर्थिक आय–व्यय विवरणमा उल्लेख नगरी खर्च गरिएको थियो ।

क्याम्पस प्रमुख शाही र लेखा अधिकृत यादव भट्टराईसहितले मिलेमतोमा उक्त रकम हिनामिना गरेको आरोप लागेको छ । रकम कहाँ खर्च भयो भनेर दुईपटक क्याम्पस प्रशासनलाई पत्राचार गरी विवरण माग गर्दा पनि क्याम्पसले उपलब्ध नगराएको विभागले जनाएको छ । विभागीय प्रमुख यशोदाकुमारी काफ्लेले विभागबाट क्याम्पसले २० लाख रुपैयाँ लगेको र उक्त पैसा क्याम्पसले के गर्‍यो भन्ने जानकारी प्राप्त नभएको बताइन् । ‘उहाँ (शाही)ले हामीसँगै पैसा लैजानुभएको हो, त्यो पैसा के गर्नुभयो भन्ने कुनै जानकारी छैन,’ उनले भनिन् । 

तर, क्याम्पस प्रमुख शाहीले भने रकम हिनामिना नभएको दाबी गर्दै शिक्षकलाई तलब खुवाउन सापटीका रूपमा लिएकाले वार्षिक आयव्ययमा समावेश गर्न आवश्यक नठानेको तर्क गरेका छन् । उनले क्याम्पसको लेखा र अडिटले छानबिन गरे सहयोग गर्न आफू तयार रहेको पनि बताए । ‘हामीले सो रकम हिनामिना गर्न ल्याएका होइनौँ, शिक्षकलाई तलब खुवाउन ल्याएका हौँ,’ उनले भने, ‘त्यतिवेला भवन बनाउँदा अन्य रकम नभएपछि विभागबाट २० लाख र त्रिवि आर्थिक प्रशासन महाशाखाबाट २० लाख रुपैयाँ सापटी ल्याएर शिक्षकलाई तलब खुवाएका थियौँ । सापटी लिएको रकम भएकाले वार्षिक आयव्ययमा समावेश गर्न आवश्यक नठानेका हौँ ।’

उनले ०७६ मा क्याम्पसको भवन तयार हुँदा १२ करोड खर्च भएको र अन्य खर्च धान्न कठिन भएपछि सापटी लिएको रकम नतिरेको बताए । मासिक विभागले ३० हजार रुपैयाँ दिने भनेर विभाग र क्याम्पसबीच बनाइएको ‘समन्वय कार्यविधि ०७६’ मा उल्लेख भएकाले सोहीअनुसार सापटी लिएको पनि उनको दाबी छ । विभाग प्रमुख काफ्लेले अनावश्यक रूपमा रकम मागेको शाहीको तर्क छ । 

‘सो रकम हामीले किन फिर्ता दिने ? उल्टै हामीलाई सहयोग गर्नुपर्ने रकम दिएको छैन,’ उनले भने, ‘विभाग प्रमुखले छलफल गर्न पनि मान्नुहुन्न, हामीलाई एकोहोरो आरोप मात्रै लगाउनुभएको छ ।’ त्रिवि आर्थिक प्रशासन महाशाखाबाट लिएको २० लाख सापटी भने तिरिसकेको उनले बताए । हाल क्याम्सपले विभागको बिजुली र पानीको शुल्कसमेत तिरिदिने गरेको, तर विभागले सहयोग नगरेको आरोप क्याम्पस प्रमुख शाहीको छ । 

 ताकेता गर्दा पनि विवरण पाएका छैनौँ
यशोदाकुमारी काफ्ले, विभागीय प्रमुख, जनप्रशासन केन्द्रीय विभाग 
क्याम्पस प्रमुख हरिभक्त शाहीले जनप्रशासन केन्द्रीय विभागबाट २० लाख रुपैयाँ ऋण लैजानुभएको हो । त्यो पैसा के गर्नुभयो भन्ने कुनै जानकारी छैन । रकम कहाँ खर्च भयो भनेर दुईपटक क्याम्पस प्रशासनलाई पत्राचार गरी विवरण माग गर्‍यौँ, क्याम्पसले उपलब्ध गराएन ।

हिनामिना गर्न होइन, तलब खुवाउन लिएका हौँ
हरिभक्त शाही, क्याम्पस प्रमुख, जनप्रशासन क्याम्पस
हामीले सो रकम हिनामिना गर्न होइन शिक्षकलाई तलब खुवाउन ल्याएका हौँ । त्यतिवेला भवन बनाउँदा अन्य रकम नभएपछि विभागबाट २० लाख र त्रिवि आर्थिक प्रशासन महाशाखाबाट २० लाख रुपैयाँ सापटी ल्याएर शिक्षकलाई तलब खुवाएका थियौँ । सापटी लिएको रकम भएकाले वार्षिक आयव्ययमा समावेश गर्न आवश्यक नठानेका हौँ ।

भर्ना शुल्क हिनामिना गर्ने कर्मचारीलाई पनि भएन कारबाही 
जनप्रशासन क्याम्पसमै यसअघि विद्यार्थी भर्ना हुँदा बुझेको शुल्क र कर्मचारीकै चेकको रकमसमेत झिकेर लेखापाल सविता श्रेष्ठसहित लेखाका तीन कर्मचारीले झन्डै दश लाख हिनामिना गरेका थिए । तर, उनीहरूमाथि हालसम्म क्याम्पस प्रशासन र विभागले कुनै कारबाही गरेको छैन । 

त्रिवि आन्तरिक लेखापरीक्षकको कार्यालयले क्याम्पसको आन्तरिक आर्थिक लेखापरीक्षण गर्ने क्रममा झन्डै चार महिनाअघि नै रकम हिनामिना भएको पत्ता लगाएको थियो  । त्यसपछि क्याम्पस प्रशासनलाई आर्थिक हिनामिनाबारे छानबिन गर्न निर्देशन दिएको थियो । त्यसलगत्तै क्याम्पस प्रशासनले आन्तरिक छानबिन गरेर आर्थिक हिनामिना भएको ठहर गर्दै तीन महिनाअघि नै त्रिभुवन विश्वविद्यालय रजिस्ट्रार कार्यालयलाई प्रतिवेदन बुझाएको थियो  । तर, हालसम्म पनि आर्थिक हिनामिना गर्ने कर्मचारीलाई रजिस्ट्रार कार्यालयले कारबाहीको गर्न सकेको छैन ।

रजिस्ट्रार कार्यालयले अख्तियारलाई देखाउँदै कारबाही गर्नबाट पन्छिँदै आएको छ । रकम हिनामिना गरेका तीनजना कर्मचारी नियमित रूपमा कार्यालयमै आइरहेका छन् । उनीहरूले गल्ती गरेको पुष्टि भएसकेकाले त्रिविले नै कारबाही गर्नुपर्नेमा नगरेको क्याम्पस प्रमुख शाही बताउँछन् । उनले चार दिनअघि सो विषयमा सोध्न अख्तियारले आफूलाई बोलाएको र हिनामिनाबारे जानकारी गराएको बताए ।