मच्छिन्द्र फुटबल क्लब एएफसी कपको छनोट चरणबाटै बाहिरिएको छ । भारतको कोलकातास्थित साल्टलेक रंगशालामा आज साँझ भएको दोस्रो प्लेअफमा भारतको मोहन बगान सुपर जायन्टसँग पराजित भएसँगै मछिन्द्र बाहिरिएको हो ।
मोहन बगानसँग कमजोर प्रदर्शन गरेको मच्छिन्द्रले ३–१ को हार ब्यहोर्यो । मोहन बगानका लागि अनवर अलीले दुई तथा सेसन कमिग्सले एक गोल गरे । मच्छिन्द्रको तर्फबाट मेसुके ओलोमोउले गोल फर्काए ।
खेलको पूरै अवधिभर सबै क्षेत्रमा मच्छिन्द्र कमजोर देखिएको थियो । गोलरक्षक विशाल श्रेष्ठले केही उत्कृष्ट बचाउहरू गरेकाले खेल ३–१ को अवस्थामा टुंगिएको हो ।
मच्छिन्द्रले गत साता काठमाडौंस्थित दशरथ रंगशालामा भएको पहिलो खेलमा भुटानको पारो एफसीलाई ३–२ गोलले हराई मोहन बगानसँगको भेट पक्का गरेको थियो ।