समाचार प्रिन्ट संस्करण

मजदुरमाथि निर्घात कुटपिट गर्नेविरुद्ध ज्यान मुद्दा

मजदुरमाथि निर्घात कुटपिट गर्ने मोरङको विराटनगर महानगरपालिका–४ का १९ वर्षीय आयुष भेटवाल, कुशल भेटुवाल र रोशन कार्कीविरुद्ध प्रहरीले ज्यान मार्ने उद्योगमा मुद्दा दर्ता गरेको छ । आरती स्टिल उद्योगका मजदुर २७ वर्षीय पवन साहलाई उनीहरूले सांघातिक आक्रमण गरी बेहोस बनाई सडक किनारमा फालेर भागेका थिए । प्रहरीले आयुषलाई पक्राउ गरिसकेको छ । कुशल र रोशन भने फरार छन् ।

मोरङ प्रहरी प्रवक्ता डिएसपी रञ्जनकुमार दाहालले फरार रहेका दुवैजनाको खोजी भइरहेको बताए । ‘पक्राउ परेकामाथि अनुसन्धान भइरहेको छ, अदालतबाट म्याद थप भएको छ,’ उनले भने, ‘फरार दुईजनालाई चाँडै समात्छौँ । घटना निकै क्रूर देखिन्छ ।’ 

स्टिल उद्योगमा कार्यरत साह काम सकेर सधैँझैँ साइकलमा विराटनगर महानगरपालिका– ६ स्थित घर फर्कँदै थिए । २० असार साँझ ८ बजेतिर विराटनगर– ४ स्थित कोसी राजमार्ग दूध फारम चोकमा पुग्दा उनीमाथि कुटपिट भएको थियो । बा.१५च ३४४५ नम्बरको कारमा सवार विराटनगर– ४ का १९ वर्षीय आयुषले साइकल रोक्दै साहको कन्चटमा मुक्का प्रहार गरे ।

साह सडकमै ढले, अचेत भए । सिसिटिभीको फुटेज हेर्दा भेटवालले कारमा रहेका अर्का व्यक्तिलाई बोलाएर साहलाई घिसारेर सडक–किनारमा ल्याएर छाडेको देखिन्छ । साहमाथि मुक्का प्रहार भएको घटनाको सिसिटिभी फुटेज सामाजिक सञ्जालमा सार्वजनिक भएपछि प्रहरीले आयुषसहित उनका भाइ १८ वर्षीय कुशल र तेह्रथुम घर भएका ३० वर्षीय रोशनविरुद्ध ज्यान मार्ने उद्योगमा मुद्दामा उजुरी दर्ता गरेर अनुसन्धान थालेको छ ।

साहको एउटै गल्ती थियो, उत्तरतर्फबाट आउँदै गरेको कारको विपरीत दिशाबाट साइकलबीच सडकमा कुदाउनु । कोसी अस्पतालमा उपचार गराएर साह घर फर्किसकेका छन् । उनले आफूमाथि किन र कसरी आक्रमण भयो भनेर थाहा नपाएको बताए । ‘काम सकेर साइकलमा घर फर्कँदै थिएँ, रोकिएको गाडीलाई कटाएर आफ्नो बाटो जाँदै थिएँ,’ उनले भने, ‘पछि कसरी आक्रमण भयो थाहा पाइनँ, होस आउँदा प्रहरीको भ्यानमा थिएँ ।’