हृदयाघातको कारण मृत्यु भएको हुन सक्ने प्रहरीकाे अनुमान

संखुवासभाका पूर्वपत्रकार तथा राजनीतिकर्मी दिनेश खनाल मृत अवस्थामा फेला परेका छन् । उनी आफ्नो घरदेखि तल रहेको बाटोमा मृत अवस्थामा फेला परेका हुन् । के कारणले उनको मृत्यु भएको हो भन्नेबारेमा केही खुलेको छैन । पोस्टमार्टमपछि उनको मृत्युको कारण खुल्नेछ ।

घरदेखि केही तल रहेको खेतबाट घर फर्किने क्रममा बाटो लडेको अवस्थामा छिमेकीले उनलाई भेटेका थिए । उनको घटनास्थलमा नै मृत्यु भएको थियो । अहिले उनको शव जिल्ला अस्पताल खाँदबारीमा पोस्टमार्टमका लागि राखिएको छ । पोस्टमार्टमपछि आजै उनको अन्त्येष्टि गरिने पारिवारिक स्रोतले जनाएको छ । 

खाँदबारी नगरपालिका– ३ झरीथुम्का घर भएका खनालको मंगलबार साँझ खेतबाट घर फर्किने क्रममा निधन भएको हो । उनको हृदयाघातको कारण मृत्यु भएको हुन सक्ने जिल्ला प्रहरी कार्यालय संखुवासभाका प्रहरी निरीक्षक सरोज खनालले जानकारी दिए । शरीरको कुनै पनि भागमा चोट नदेखिएकाले हृदयघातको कारणले मृत्यु भएको हो कि भन्ने प्रहरीको अनुमान छ । 

५० वर्षीय खनालले संखुवासभामा लामो समयदेखि सक्रिय पत्रकारिता गरेका थिए । उनी राष्ट्रिय प्रजातन्त्र पार्टी संखुवासभाका जिल्ला कोषाध्यक्षसमेत हुन् । एक छोरा र श्रीमती रहेका खनाल राजनीतिमा समेत सक्रिय थिए ।