सुत्नुअघि पढ्ने बानी बसाल्नुका धेरै फाइदा छन् । तपाईंंको निद्राको गुणस्तर राम्रो हुन्छ र शरीरले आराम महसुस गर्छ । तपाईंले शान्त महसुस गर्नुहुन्छ र भोलिपल्ट नयाँ सुरुवात गर्न ऊर्जा मिल्छ । 

दिनभरको थकान, चिन्ता र व्यस्ततालाई बिर्सिएर तपाईं पुस्तक वा कथाको पात्रका विषयमा सोच्न थाल्नुहुन्छ । तपाईं फरक दुनियाँमा पुग्नुहुन्छ र फरक संस्कार र फरक दृष्टिले सोच्न थाल्नुहुन्छ । 

धेरैजसो मानिस रातको समय इलेक्ट्रोनिक डिभाइसमा झुम्मिरहेका हुन्छन् । अत्यधिक समय स्मार्टफोन, ट्याबलेट वा कम्प्युटर चलाउने बानी खासमा राम्रो होइन । विशेषगरी, ओछ्यानमा पल्टिएर मोबाइल चलाउनु राम्रो मानिदैन ।

किनकि, यस्ता डिभाइसले ब्लु लाइट फ्याँक्छन्, जसले राम्रो निद्रा लगाउने ‘मेलाटोनिन’ नामक हर्मोनको उत्पादनमा असर गर्छ । पुस्तक पढ्दा तपाईं ब्लु लाइटको असरबाट जोगिनुहुन्छ र निद्रा राम्रो लाग्छ । अध्ययनले मस्तिष्कलाई सक्रिय राख्छ । यसले तपाईंको कल्पना शक्ति र ज्ञान बढाउँछ । स्मरणशक्ति र मस्तिष्कको कार्यक्षमता बढाउँछ ।