आमाबाबुमाथि बन्चरो प्रहार, छाेरा फरार

बझाङको जयपृथ्वी नगरपालिका– ११ मा एक छोराले आमाबाबुमाथि बन्चरो प्रहार गरेका छन् । बन्चरो प्रहारबाट दुवै घाइते भएका छन् । बाबुकाे अवस्था गम्भीर छ । 

जयपृथ्वी नगरपालिका– ११ दैकुमलामा १६ वर्षीय अमृत रोकायाले आमाबाबुमाथि बन्चरो प्रहार गरेका हुन् । आज बिहानै घटनापछि उनी फरार भएका छन् । 

मंगलबार बिहान करिब तीन बजेतिर सुतिरहेका बाबुमाथि बन्चरो प्रहार भएको पाइएको जिल्ला प्रहरी कार्यालय बझाङले जनाएको छ । पटक–पटक झैझगडामा परेका छोरालाई सम्झाएर सुतेका बाबुमाथि सुतेकै अवस्थामा आक्रमण भएको हो । 

आमाले थाहा पाएपछि बन्चरो खोस्न लाग्दा अमृतले आमामाथि पनि प्रहार गरेको जिल्ला प्रहरी कार्यालय बझाङका सूचना अधिकारी रमेशदत्त अवस्थीले जानकारी दिए । 

घाइते बाबुको अवस्था गम्भीर रहेकाले थप उपचारका लागि कैलालीस्थित धनगढी रिफर गरिएको छ । आमाको पिठ्युँमा तीन टाँका लगाइएको जिल्ला अस्पताल बझाङले जनाएको छ । बन्चरो प्रहारपछि फरार भएका अमृतको प्रहरीले खोजी गरिरहेको छ ।