बागमती प्रदेशका मुख्यमन्त्री शालिकराम जम्कट्टेलले डेढ महिनादेखि मन्त्रिपरिषद्लाई पूर्णता दिन सकेका छैनन् । उनले दोस्रोपटक विश्वासको मत लिएको ४५ दिन पुगेको छ । ११ सदस्यीय मन्त्रिपरिषद्मा ६ जना मात्रै मन्त्री छन् । मुख्यमन्त्री जम्कट्टेलले थप पाँचवटा मन्त्रालयको जिम्मेवारी लिएका छन् ।

माओवादीले पाएका चारवटा मन्त्रालय मुख्यमन्त्री जम्कट्टेल र दुईवटा मन्त्रालय कांग्रेसले सम्हाल्दै आएको छ । ११ सदस्यीय मन्त्रिपरिषद्मा अझै पनि पाँचवटा मन्त्रालय खाली छ । राष्ट्रपतिको निर्वाचनसँगै गत निर्वाचनकै समयको गठबन्धन ब्युँतिएपछि माओवादी नेता जम्कट्टेल नेतृत्वको सरकारबाट १३ फागुनमा राप्रपा र २० चैतमा एमाले सरकारबाट बाहिरिएको थियो । मुख्यमन्त्री जम्कट्टेलले १० चैतमा दोस्रोपटक विश्वासको मत लिएका हुन् ।

मुख्यमन्त्रीले विश्वासको मत पाएसँगै सरकारमा कांग्रेस, एकीकृत समाजवादी र हाम्रो नेपाली पार्टी सहभागी हुने चर्चा चलेको थियो । तर, माओवादी र कांग्रेसबीच मन्त्रालयको भागबन्डाको विषयमा सहमति हुन नसक्दा अहिलेसम्म सरकारले पूर्णता पाउन सकेको छैन । एकीकृत समाजवादी र हाम्रो नेपाली पार्टी सरकारमा सहभागी हुने कुरा अन्योल बनेको छ । कांग्रेसबाट बागमती प्रदेश संसदीय दलका नेता बहादुरसिंह लामाको नेतृत्वमा दुईजना मन्त्री सरकारमा सहभागी छन् ।

सरकार विस्तार हुन नसक्नुमा माओवादी र कांग्रेसले एकअर्कालाई आरोप लगाइरहेका छन् । कांग्रेसले आफ्नो भागमा परेको मन्त्रालयमा मन्त्रीहरूको नाम नपठाउँदा मन्त्रिपरिषद् विस्तारमा ढिलाइ भएको मुख्यमन्त्री जम्कट्टेलको दाबी छ । उनले कांग्रेसले सरकारमा सहभागी हुने मन्त्रीहरूको नाम टुंगो लगाउन नसक्दा समस्या भएको बताए । ‘हामीले कांग्रेसलाई पटकपटक मन्त्रीको नाम दिन भनेका छौँ, तर उहाँहरूले नाम दिनसक्नुभएको छैन,’ उनले भने, ‘साझा सरकार भएपछि सबैलाई मिलाएर लैजानुपर्ने बाध्यता छ । तर, कांग्रेसका साथीहरूले बढी मन्त्रालय माग्दा समस्या भयो ।’ कांग्रेसलाई पाँच मन्त्रालय दिन सकिने भए पनि ६ मन्त्रालय मागेको मुख्यमन्त्री जम्कट्टेलले बताए । एकीकृत समाजवादीलाई पनि सरकारमा सहभागी गराउनुपर्ने भएकाले कांग्रेसले गरिरहेको मन्त्रालयको संख्याको दाबी घटाउनुपर्ने उनको भनाइ छ ।

कांग्रेसले भने मुख्यमन्त्री जम्कट्टेल आफ्नो प्रतिबद्धताबाट पछि हट्दा समस्या भएको आरोप लगाएको छ । आर्थिक मामिलामन्त्रीसमेत रहेका कांग्रेस बागमती प्रदेश दलका नेता बहादुरसिंह लामाले सुरुमा मुख्यमन्त्री जम्कट्टेलले बोलेको कुरामा अडिग नहुँदा समस्या भएको दाबी गरे । उनले मुख्यमन्त्रीले सुरुमा कांग्रेसलाई ६ वटा मन्त्रालय दिने वचन दिए पनि अहिले आफ्नो प्रतिबद्धताबाट पछि हटेको आरोप लगाए । ‘मुख्यमन्त्री अहिले आफूले बोलेको कुराबाट पछि हट्नुभयो । सिट संख्याका आधारमा कांग्रेसले ६ वटा मन्त्रालय पाउने सहमति भएको थियो । तर, मुख्यमन्त्री अहिले आएर हुन्न भन्नुहुन्छ,’ नेता लामाले भने । उनले माओवादीसँग सुरुमा ६ सांसदबराबर एक मन्त्री पाउने गरी सहमति भएको पनि दाबी गरे । सोहीअनुरूप कांग्रेसले ६ वटा मन्त्रालय पाउनुपर्ने उनको भनाइ छ ।

नेता लामाले मुख्यमन्त्री जम्कट्टेलसमक्ष कांग्रेसको माग स्पष्ट रहेको जानकारी दिँदै सोमबारसम्म पूरा नभए सरकार छोड्न सक्नेसम्मको चेतावनी दिए । ‘हाम्रो बटमलाइन ६ मन्त्रालय हो । सिट संख्या र सुरुमा भएको सहमतिअनुसार हाम्रो माग जायज छ । मुख्यमन्त्रीलाई सहमतिका लागि सोमबारसम्मको समय दिएका छौँ । त्यतिन्जेल माग सम्बोधन भए ठीकै छ, नत्र हामी सरकारबाट बाहिरिन पनि सक्छौँ,’ उनले भने, ‘सहमति र सहकार्यलाई कसरी अगाडि बढाउने भन्ने कुरा नेतृत्वमा भरपर्छ । सरकारमा सहभागी दलहरूलाई मिलाएर लैजान मुख्यमन्त्रीले तत्परता देखाउनुपर्छ ।’ नेता लामाले भने । उनले एकीकृत समाजवादीले मानेन भनेर मुख्यमन्त्रीले सरकारलाई अधुरै राख्न नमिल्ने बताए । 

सत्तामा सहभागी मुख्य दलहरूबीच नै भागबन्डा नटुगिँदा गठबन्धनमा सामेल एकीकृत समाजवादी पनि सरकारमा गएको छैन । एकीकृत समाजवादीका सांसद कृष्णप्रसाद शर्माले गठबन्धनमा रहेका ठूला दलहरूमा रहेको अहंताले मन्त्रिपरिषद् विस्तार हुन नसकेको बताए ।

प्रदेशको मुख्यमन्त्री तथा मन्त्रिपरिषद् कार्यालयसहित आन्तरिक मामिला तथा कानुन मन्त्रालय, भौतिक पूर्वाधार विकास मन्त्रालय र समाजिक विकास मन्त्रालयमा माओवादीका मन्त्री छन् भने आर्थिक मामिला तथा योजना मन्त्रालय र खानेपानी, ऊर्जा तथा सिँचाइ मन्त्रालयमा कांग्रेसका मन्त्री छन् । वन तथा वातावरण मन्त्रालय, श्रम, रोजगार तथा यातायात मन्त्रालय, स्वास्थ्य मन्त्रालय, पर्यटन उद्योग तथा सहकारी मन्त्रालय र कृषि तथा पशुपन्छी विकास मन्त्रालय अझै पनि मन्त्रीविहीन छन् । ती मन्त्रालयको जिम्मेवारी मुख्यमन्त्री जम्कट्टेलको काँधमा छ ।