- वि.सं २o८o बैशाख १८ सोमबार
उद्योग, वाणिज्य तथा आपूर्तिमन्त्री रमेश रिजालले काठमाडौंको भृकुटीमण्डपमा जारी ‘बृहत् जुत्ताचप्पल व्यापार मेला’को अवलोकन गरेका छन् ।
उनले आइतबार मेलास्थलमा पुगेर जुत्ताचप्पलका सबै स्टलहरूको अवलोकन गरेका हुन् । जुत्ताचप्पलका स्वदेशी उद्योग तथा उत्पादनलाई प्राथमिकता राखेर र प्रवर्द्धन गर्नुपर्ने मान्यतासहित मन्त्री रिजालले मेलाको अवलोकन गरेका हुन् ।
मेलाको अवलोकन गर्ने क्रममा मन्त्री रिजालले तीन जोर जुत्ताचप्पलसमेत खरिद गरे । मन्त्रीले मेलामा उपस्थित भएर स्वदेशी ब्रान्डप्रति चासो देखाउनु सकारात्मक कदम भएको आयोजक सबिन कार्कीले बताए ।
‘मन्त्रीले चासोका साथ मेलाको अवलोकन गर्नुभयो,’ उनले भने, ‘स्वदेशी उद्योग र स्वदेशी ब्रान्डलाई अब सरकारले प्राथमिकतामा राख्नुपर्छ ।’
मन्त्री रिजालले मेलाको अवलोकन गरे पनि जुत्ता नै खरिद गर्छन् भन्ने आयोजकलाई लागेको थिएन । मन्त्री रिजालले आफ्नो लागि तीन जोर जुत्ता खरिद गरेपछि आयोजक उत्साही भएका थिए ।
