- वि.सं २०८१ बैशाख ७ शुक्रबार
एसिसी प्रिमियर कप प्रतियोगिताको फाइनल खेल चलिरहेको कीर्तिपुरस्थित त्रिवि अन्तर्राष्ट्रिय खेलमैदानमा पुनः वर्षा भएको छ ।
वर्षा हुन थालेपछि खेल रोकिएको छ । अहिले पिच र मैदानको केही भागलाई कभर गरिएको छ । अम्पाएर र खेलाडी पेभेलियन फर्किएका छन् ।
वर्षाले खेल रोकिएका वेला युएईले २७.३ ओभरमा १०६ रन बनाउँदा नाै विकेट गुमाइसकेको छ ।
युएईको इनिङ ध्वस्त बनाउने क्रममा ललित राजवंशीले तीन, करण केसी र सन्दीप लामिछानेले दुई–दुई तथा सोमपाल कामी र गुल्सन झाले एक–एक विकेट लिएका छन् ।
यसअघि टस जितेर नेपालले फिल्डिङ रोजेपछि युएई ब्याटिङमा आएको हो । तर, नेपाली स्पिनर र सिमरले जबर्जस्त बलिङ गरेपछि युएई धराशायी बनेको हो ।
