- वि.सं २o७९ चैत १४ मंगलबार
जर्मनीले युक्रेनलाई लियोपार्ड– २ ट्यांक प्रदान गरेको छ । युक्रेनलाई हतियार सहायता गर्ने प्रतिबद्धताअनुसार लियोपार्ड– २ ट्यांकको पहिलो खेप किभ पठाइएको जर्मनीको रक्षा मन्त्रालयले जनाएको छ ।
युक्रेनी टोलीलाई लियोपार्ड– २ ट्यांक प्रयोग र सञ्चालनको प्रशिक्षण दिएपछि पहिलो खेपमा १८ वटा अत्याधुनिक युद्ध ट्यांक पठाइएको रक्षामन्त्री बोरिस पिस्टोरियसले बताएका छन् । गत जनवरीमा जर्मनीले युक्रेनलाई लियोपार्ड– २ ट्यांक प्रदान गर्ने आश्वासन दिएको थियो ।
‘हाम्रा युक्रेनी साथीहरूले ट्यांक प्राप्त गर्नुभएको छ । लामो समयसम्म हाम्रो सेनाले युक्रेनी पक्षलाई ट्यांक प्रयोग र सञ्चालनको प्रशिक्षण दिएको थियो,’ रक्षामन्त्री पिस्टोयिसले भनेका छन् ।
किभबाट प्राप्त समाचारअनुसार बेलायतले प्रदान गरेका च्यालेञ्जर– २ ट्यांक पनि युक्रेन पुगेका छन् । गत वर्ष रुसले आफूमाथि आक्रमण गरेपछि युक्रेनले आफ्ना समर्थक मुलुकसँग थप आधुनिक सवारीसाधन र हतियार माग गर्दै आएको थियो ।
बेलायतबाट आफूलाई लियोपार्ड– २ प्राप्त भएको सम्बन्धमा किभले कुनै जानकारी नदिए पनि च्यालेञ्जर– २ ट्यांक प्राप्त गरेको पुष्टि गरेको छ ।
बेलायतको रक्षा मन्त्रालयका प्रवक्ता इरिना जोलोटारले च्यालेञ्जर– २ ट्यांक युक्रेन पुगेका जानकारी दिँदै युक्रेनी सैन्य टोलीले ट्यांक सञ्चालनको तालिम बेलायतमा लिएको बताइन् । यद्यपि, उनले लियोपार्ड– २ बारे कुनै जानकारी दिएकी छैनन् ।
