- वि.सं २o७९ मङ्सिर २४ शनिबार
विश्वकप फुटबलमा इतिहास कोर्दै मोरक्को सेमिफाइनलमा प्रवेश गरेको छ ।
सेमिफाइनल पुग्ने पहिलो अफ्रिकन मुलुक बन्ने इतिहासि कोर्ने क्रममा मोरक्कोले पोर्चुगललाई १–० ले हरायो ।
मोरक्कोको जितमा युसेफ नेसरीले ४२औँ मिनेटमा गरेको गोल नै निर्णायक बन्यो । पहिलो हाफको तुलनामा मोरक्कोले दोस्रो हाफमा लगातार दबाब बनाए पनि गोलमा परिणत गर्न सकेन ।
आजको खेलमा पनि क्रिश्चियानो रोनाल्डो पहिलो रोजाइमा परेनन् । एक गोलले पछि परेको अवस्थामा म्यानेजर सान्तोषले रोनाल्डोलाई ५०औँ मिनेटमा मैदानमा पठाएका थिए । तर, सम्भवतः अन्तिम विश्वकप खेलिरहेका रोनाल्डोले टिमलाई उद्धार गर्न सकेनन् ।
मोरक्को अन्तिम पाँच मिनेट दश खेलाडीमा सीमित भएको थियो । ९३औँ मिनेटमा वालिद चेदिरा दोहोरो पहेँलो कार्ड खाँदै मैदानबाट बाहिरिएका थिए । तर, पोर्चुगलले त्यसको फाइदा उठाउन सकेन ।
मोरक्को अब आजै राति हुने फ्रान्स र इंग्ल्यान्डबीचको विजेतासँग फाइनल प्रवेशका लागि भिड्नेछ ।
