Skip This
उदयपुरमा मिनीट्रक दुर्घटना हुँदा एकजनाको मृत्यु भएको छ। मदन भण्डारी लोकमार्गको उदयपुरगढी गाउँपालिका– ७ अँधेरी झर्नाखण्डमा मिनीट्रक दुर्घटना हुँदा एकजनाको मृत्यु भएको हो।
जिल्ला प्रहरी कार्यालय उदयपुरका सूचना अधिकारी डिएसपी राजन चापागाईंका अनुसार दुर्घटनामा परी मृत्यु हुनेमा सोही ट्रकका सहचालक सुनसरी इटहरी उपमहानगरपालिका– २ बस्ने २४ वर्षीय सुदीप राई रहेका छन्।
काठमाडौंबाट सुनसरीतर्फ जाँदै गरेको बागमती प्रदेश ०१–००६ ख ५७४९ नम्बरको ट्रक आफैँ अनियन्त्रित हुँदा दुर्घटनामा परेको थियो।
दुर्घटनाग्रस्त ट्रक र सोही ठाउँ बस्ने ट्रकका चालक विज्ञान तामाङलाई नियन्त्रणमा लिएर अनुसन्धान थालेको प्रहरीले जनाएको छ। मृतक राईको शव जिल्ला अस्पताल उदयपुरमा पोस्टमार्टम गरी आफन्तलाई बुझाइएको डिएसपी चापागाईंले जानकारी दिए।
