श्रीमतीको हत्या आरोपमा विक पक्राउ

मदिरा सेवन गरी श्रीमतीको हत्या गरेको आरोपमा प्रहरीले बुटवल–११ बस्ने ३१ वर्षीय सागर विकलाई पक्राउ गरेको छ। इलाका प्रहरी कार्यालय बुटवलका प्रहरी निरीक्षक धर्मराज खत्रीका अनुसार बुटवल उपमहानगरपालिका–११, माझगाउँ सत्यवती टोलकी २१ वर्षीया अञ्जली विकको सोमबार दिउँसो हत्या भएको छ। हत्याको आरोपमा उनकै श्रीमान् सागर विकल पक्राउ परेका  हुन्।

श्रीमान् श्रीमतीबिच दैनिकजसो झगडा तथा कुटपिट हुने गरेको प्रारम्भिक अनुसन्धानमा खुलेको प्रहरीको भनाइ छ। सोमबार पनि अत्यधिक मदिरा सेवन गरेर सागरले कुटपिट गर्दा दिउँसो ३ बजेतिर अञ्जलीको घटनास्थलमै मृत्यु भएको प्रहरीको भनाइ छ। 

घटनास्थलबाट काठको चिरपट बरामद भएको र सागरलाई पनि नियन्त्रणमा लिएर अनुसन्धान भइरहेको प्रहरी निरीक्षक खत्रीले बताए। सानो टहरामा बस्दै आएका उनीहरू दैनिक ज्याला मजदुरी गर्ने र दैनिकजसो झगडा गर्ने गरेको स्थानीयले बताएको प्रहरीको भनाइ छ।