घुम्ती कोषबाट आयआर्जनमा जोडिँदै मुक्त कमलरी 

–तुलसीपुर उपमहानगरपालिका–१८ निवासी मनप्यारी चौधरी अचेल दिनभर खेतबारीमै व्यस्त हुन्छिन् । व्यवसायीक रुपमा तरकारी खेती गर्न थालेपछि उनको दैनिकी खेतबारीमै बित्ने गरेको छ । 

–तुलसीपुर–१८ की मुक्त कमलरी आशा चौधरी पनि अचेल दिनभर खेतबारीमै भेटिन्छिन् । यसबाहेक उनले व्यवसायीक रुपमा बाख्रापालन समेत गरेकी छिन् ।

–तुलसीपुर–१६ डोक्रेनाकी मुक्त कमलरी सुनिता चौधरी पनि खेतमा गोलभेँडा खेती र भेँडापालन गरेकी छिन् । यसबाट उनले राम्रै आम्दानी गरिरहेको बताइन् ।

उनीहरू त प्रतिनिधि पात्र मात्रै हुन् । मुक्त कमलरी विकास मञ्चले चलाएको घुम्ती कोषबाट रकम लिएर उनीहरू व्यवसायमा जोडिन थालेकी हुन् । घुम्ती कोषबाट उनीहरूलाई ३० हजार प्रदान गरिएको थियो । उक्त रकमले व्यवसाय सुरु गर्न सहज भएको सुनिताले बताइन् । ‘पहिले के गर्ने, कसो गर्ने भनेर अलमलमा थियौं, दैनिक खर्च जुटाउन पनि गाह्रो पथ्र्यो,’ उनले भनिन् ‘अहिले घुम्ती कोषबाट रकम लिएर व्यवसाय गर्न थालेका छौं, यसले व्यस्त पनि बनाएको छ, आम्दानीको बाटो पनि खुलेको छ ।’ 

तालिम पनि पाउने र घुम्ती कोष पनि पाउने भएपछि महिलालाई व्यवसाय गर्ने आँट पनि बढेको छ । मुक्तकम्लरी तथा न्यून आयस्तर भएका महिलाहरूलाई लक्षित गरी आयस्तरमा जोड्न थालको हो । मुक्तकम्लरी विकास मन्च दाङले तुलसीपुर उपमहानगरपालिका वडा नम्बर १५, १६ र १८ का महिलालाई आयआर्जनमा जोड्न कार्यक्रम चलाएको छ ।
एक वर्षमा ३० जना घुम्ती कोषबाट व्यवसायमा जोडिएका छन् भने १४ जनालाई बंगुर, बाख्रापालन लगायतका तालिम प्रदान गरिएको छ । तालिम प्राप्तहरूलाई बंगुरका पाठा समेत उपलब्ध गराएको कार्यक्रम संयोजक सुलोचना चौधरीले बताइन् ।

यस्तै विभिन्न सचेतनामुलक तथा व्यवसायिक तालिम समेत प्रदान गर्ने गरिएको छ । तीनवटा वडामा तीनवटा युवा क्लब समेत गठन गरिएको छ । युवा क्लबहरूले बाल विवाह न्यूनिकरण, सचेतनामुलक सडक नाटक देखाउँदै आएका छन् । तीन वडामा सातवटा समूह पनि बनाइएको छ । 

मुक्त कमलरी, दलित, अतिविपन्न महिलालाई आम्दानीमा जोड्न गत वर्षदेखि ‘मुक्तकम्लरी शसक्तिकरण परियोजना’ सञ्चालित रहेको मन्चका उपाध्यक्ष निर्मला चौधरीले बताइन् । आइएम नेपालको सहयोगमा उक्त कार्यक्रम सञ्चालनमा गरिएको हो । 

न्यून आर्थिक अवस्था भएकाहरूलाई व्यवसायमा जोड्ने गरी सञ्चालित कार्यक्रमले समाजलाई आत्मनिर्भरताको बाटोतर्फ उन्मुख गराउने तुलसीपुर उपमहानगरपालिकाका प्रमुख टिकाराम खड्काले बताए । ‘यस्ता कार्यक्रमले समाजलाई आत्मनिर्भर बनाउँछ, आम्दानीका स्रोतहरू बढाउँछ,’ उनले भने, ‘यस्ता कार्यक्रम निरन्तर चल्नुपर्छ ।’