१९ वर्षपछि बक्सर टाइसन रिङमा उत्रँदै

विश्वप्रसिद्ध बक्सर माइक टाइसनले शुक्रबार जाके पाउलविरुद्ध प्रतिस्पर्धा गर्दै छन् । टाइसन १९ वर्षपछि रिङमा उत्रन लागेका हुन् । टाइसन र पाउलले प्रतिस्पर्धा गर्नुअघि बिहीबार आयोजित पत्रकार सम्मेलनमा जितबाहेक अरू विकल्प नभएको दाबी गरेका छन् । डालासको टी. एन्ड. टी. रंगशालामा ६० हजार दर्शकले टाइसनको खेल हेर्नेछन् । आयोजकका अनुसार रंगशाला हाउसफुल भएको छ । पूर्वविश्व हेभिवेट च्याम्पियन टाइसन अहिले ५८ वर्षका हुन् । 

सन् १९९० को दशकमा अन्तर्राष्ट्रिय बक्सिङमा एकछत्र राज गरेका टाइसनलाई चुनौती दिएका पाउल २७ वर्षका छन् । टाइसनले आफूभन्दा ३१ वर्ष कान्छो युवा खेलाडीविरुद्ध पुरानै जोसमा प्रतिस्पर्धा गर्ने बताएका छन् । उनले यसको झल्को पत्रकार सम्मेलनमा दिएका थिए । पाउलले प्रतिक्रिया दिइरहँदा टाइसनले उनको माइक्रोफोन खोसेका थिए । लगभग दुईबिच भिडन्त हुने स्थिति आयो । तर, सुरक्षाकर्मीले दुवैलाई तानेर टाढा लगे । 

विश्व बक्सिङमा टाइसनलाई निर्दयी मुक्केबाज भनिन्छ । उनले एक व्यावसायिक खेलमा विपक्षीका कान टोकेका थिए । ‘म विपक्षीको प्रहारअनुसार उत्तर दिनेछु,’ टाइसनले भने, ‘अहिले म भर्खरका खेलाडीलाई सहजै नकआउट गर्न सक्छु ।’ कार्यक्रम सञ्चालक टेलोरले माहोल तताउने काम गरेका थिए । टेलोरले सुरुमै विश्वकै ‘लेडी किलर’ टाइसन भनी सम्बोधन गरेका थिए । हलमा लेडी किलर शब्द सुनेपछि टाइसन सम्हालिन सकेनन् । उनले टेलोरको पनि माइक्रोफोन खोसे । सन् २०२२ मा टेलोरले लाइट वेट विधामा उपाधि जितेका थिए । 

होलिफिल्डविरुद्धको त्यो खेल
सन् १९९७ को कुरो हो । त्यसवेला टाइसन फर्ममा थिए । उनले एक खेलमा तत्कालका विश्व च्याम्पियन इभान्डर होलिफिल्डलाई चुनौती दिएका थिए । टाइसन र होलिफिल्ड आ–आफ्नो बक्सिङ करिअरमा अपराजित जस्तै थिए । यी दुई खेलको प्रमोसन व्यापक गरिएको थियो । आयोजकले यसै खेलबाट करोडौँ डलर कमाए । खेलअगाडि आयोजना भएका प्रत्येक पत्रकार सम्मेलनमा टाइसन र होलिफिल्डबिच झडप हुन्थ्यो । कतिपय अवस्थामा कडा सुरक्षा व्यवस्था तयार परिएको हुन्थ्यो । रिङमा जानुअघिसम्म उनीहरूले एकआपसमा ‘बक्सिङ करिअर’ सिध्याउने चेतावनी दिएका थिए । 

संसारले प्रतीक्षा गरेको खेल सुरु भयो, त्यहाँको माहोल नै बिलकुल फरक देखियो । सुरुमै होलिफिल्डले टाइसनमाथि मुक्का प्रहार गरे । रिसमाथि नियन्त्रण गर्न नसक्ने टाइसनले होलिफिल्डलाई एउटा कुनामा लगे । उनले विपक्षीलाई मुक्का प्रहार गरेनन् । टाइसनले होलिफिल्डको कानबाट एक टुक्रा नै निकाले । रेफ्रीले टाइसनलाई अयोग्य घोषणा गरे । बक्सिङ इतिहासमा यो खेल अहिलेसम्मकै विवादास्पद मानिएको छ । १९ वर्षपछि पुनः रिङमा फर्कन लागेका टाइसनले सम्भवतः यस्तै खेल दर्शकले देख्न पाउने बताए । अर्कोतिर पाउलले आफ्नो प्रतिद्वन्द्वीको टिप्पणीलाई वास्ता नै गरेनन् । 

तीन वर्ष जेल
टाइसनको करिअर निकै उतार–चढावका रूपमा बितेको छ । रिङदेखि बाहिरी संसारमा उनी सधैँ विवादमा परिरहे । अन्तर्राष्ट्रिय बक्सिङमा उनलाई इतिहासकै सबैभन्दा विवादास्पद र अस्थिर व्यक्तित्वका रूपमा लिने गरिन्छ । एक निर्विवाद च्याम्पियन खेलाडी बलात्कारका लागि तीन वर्षको जेल सजाय भोगेका थिए । बिहीबार आयोजित पत्रकार सम्मेलनमा टाइसनका विगतका फोटो स्मरण हुँदा ती विवादित पक्षहरू समेटिएका थिए । टाइसनले ती क्षणहरूलाई गम्भीरतापूर्वक हेरेका थिए ।