प्रमाणपत्र तहमुनिका चिकित्सा शिक्षाका ६५ संस्थाको स्तर वृद्धि
पूर्वाधार नपुग्दा दर्जनौँको सिट निर्धारण भएन, केहीको ठेगानासमेत भेटिएन
चिकित्सा शिक्षा ऐनले प्रमाणपत्र तहमुनिका चिकित्सा शिक्षाका कार्यक्रम फेजआउट गरेपछि ६५ संस्थाले माथिल्लो तहका कार्यक्रम सञ्चालनको अनुमति पाएका छन् । प्रमाणपत्र तह सञ्चालन गरेका संस्थाको संख्या धेरै भए पनि निर्धारित समयमा निवेदन दिएका ६५ संस्थाले स्तरवृद्धिको अनुमति पाएका हुन् । स्तरवृद्धिको अनुमति पाएका कतिपय संस्था ठेगानै नभेटिएको र कतिपयको शिक्षक तथा पूर्वाधार नहुँदा सिट निर्धारण भएको छैन ।
चिकित्सा शिक्षा आयोगका सूचना अधिकारी सेमन्तराज कोइरालाले ऐनले दिएको अधिकार प्रयोग गरी कार्यविधि बनाएर ६५ संस्थाको कार्यक्रम अपग्रेड भएको र सिट निर्धारण भएकाले कार्यक्रम सञ्चालन गर्न सक्ने बताए । तोकिएको गत ९ फागुनसम्मको अन्तिम मितिसम्म पनि निवेदन नदिएको, तर पछि माग गरेकाले प्राप्त गर्न नसकेको उनको भनाइ छ । तोकिएको मितिभन्दा पछि आएका तीन दर्जन संस्था अदालत गएका छन् ।
चिकित्सा शिक्षा ऐनले प्रमाणपत्र तहभन्दा मुनिका चिकित्सा शिक्षाका अनमी, नर्सिङ, ल्याब, फार्मेसीलगायतका कार्यक्रम फेजआउट गरेको थियो । ती कार्यक्रम फेजआउट भएर स्तरोन्नतिको निर्णय भएका संस्थाको समेत अनुगमनका क्रममा सबै पूर्वाधार नपुगेकाले यसपटक सिट निर्धारण भएको छैन । प्रमाणपत्र तहभन्दा तलको जनशक्ति आवश्यक नभएको भन्दै ऐनले फेटआउट गरेको थियो । स्तरोन्नति भएका संस्थाले एकभन्दा बढी कार्यक्रम सञ्चालनको अनुमति पाएका छन् ।
शिक्षकदेखि ठेगाना नभएकाले पाएनन् सिट
सिटिइभिटीअन्तर्गतको कार्यक्रम सञ्चालन गर्ने अनुमति मागेका र स्तरोन्नति भएका शिक्षण संस्थाहरूमा समेत मापदण्ड पूरा नभएको पाइएको छ । कतिपय संस्थामा कक्षाकोठा नभएको, सामग्रीको बिल मात्र प्राप्त भएको, तर सामग्री नपाइएको, शिक्षक नभएको र कतिपयको अस्पतालसँग सम्झौता नभएको उल्लेख छ । इटहरीको हेल्थ कलेजलाई प्रमाणपत्र तहमा रेडियोग्राफी कार्यक्रम सञ्चालनका लागि अनुमति दिएको छ, तर अनुगमनमा फेला नपरेको विवरणमा उल्लेख छ ।
चिकित्सा शिक्षाको लाइसेन्स परीक्षामा ४२ प्रतिशत उत्तीर्ण
नेपाल मेडिकल काउन्सिलले लिएको मेडिकल र डेन्टल परीक्षामा ४२.३२ प्रतिशत मात्र उत्तीर्ण भएका छन् । ६ देखि ८ असोजमा सञ्चालन भएको लाइसेन्स परीक्षामा दुई हजार ३९ परीक्षार्थी सहभागी भएकामा आठ सय ६३ विद्यार्थी मात्रै उत्तीर्ण भएका हुन् । काउन्सिलका रजिस्ट्रार कृष्णप्रसाद अधिकारीका अनुसार मेडिकलमा एक हजार ६ सय ८६ र डेन्टलमा तीन सय ५३ परीक्षार्थी सहभागी भएका छन् । तीमध्ये मेडिकलमा सात सय ४० र डेन्टलमा एक सय २३ विद्यार्थी मात्र उत्तीर्ण भएका छन् । अधिकारीले परीक्षामा अप्रिय गतिविधि नभएको बताए । २१ परीक्षार्थी परीक्षामा अनुपस्थित भएका थिए ।