- वि.सं २o७९ जेठ ८ आइतबार
परराष्ट्रमन्त्री डा. नारायण खड्कासँग संयुक्त राज्य अमेरिकाका उपविदेशमन्त्री उज्रा जिया नेतृत्वको प्रतिनिधिमण्डलले शिष्टाचार भेटवार्ता गरेको छ।
परराष्ट्र मन्त्रालयमा आज भएको सो भेटमा द्विपक्षीय–बहुपक्षीय मञ्चहरूमा मैत्रीपूर्ण द्विपक्षीय सम्बन्ध र सहयोगसम्बन्धी विभिन्न विषयमा छलफल भएको मन्त्रालयले जनाएको छ। तिब्बत मामिलाका लागि अमेरिकी विशेष संयोजकसमेत रहेकी उनी तीनदिने नेपाल भ्रमणका क्रममा शुक्रबार काठमाडौं आइपुगेकी हुन्।
यो वर्ष नेपाल र अमेरिकाबीच कूटनीतिक सम्बन्ध स्थापनाको ७५औँ वर्ष चलिरहेको छ। यस अवसरमा भ्रमणका लागि अमेरिकाबाट उच्च अधिकारीहरू नेपाल आइरहेका छन्। रासस
