- वि.सं २o७८ चैत ६ आइतबार
गायक प्रकाश सपुतले ‘पिर’ गीतको भिडियोबाट माओवादी पूर्वलडाकुको देहव्यापारसम्बन्धी दृश्य हटाएका छन् । गायक सपुतले शनिबार सामाजिक सञ्जालमार्फत गीतको भिडियोमा देखाइएको देहव्यापारको दृश्यलाई हटाएको जानकारी गराएका हुन् । उनले भिडियोलाई सम्पादन गरेर पुनः युट्युबमा अपलोड गरेको जानकारी दिएका छन् ।
नियोजित रूपमा माओवादी आन्दोलनलाई बदनाम गर्न खोजिएको आरोप लागेपछि गीतको भिडियो सम्पादन गरेको उनले बताए । ‘केही दृश्यमाथिको आलोचना, व्यापक चर्चासहित व्यावसायिक रूपमा सफल भएको गीत र भिडियो त हटाएको छ । तर, गीत र भिडियोमा गरिएको नेपाली समाजको चित्रण हटाएको छैन ! आम नेपालीको अवस्थाको प्रतिबिम्ब हटाएको छैन,’ उनले भनेका छन् ।
उनले पुरानो भिडियोमा रहेको देहव्यापार झल्किने दृश्य हटाएका छन् । उनले अघिल्लो साता सार्वजनिक गरेको गीत युट्युबमा अपलोड गरेलगत्तै विवादित बनेको थियो । उनको भिडियो एक सातामा करोडभन्दा बढीले हेरिसकेका थिए ।
