सुदूरपश्चिम प्रदेशका भौतिक पूर्वाधार विकासमन्त्री पठानसिंह बोहरा मन्त्री पदबाट बर्खास्त भएका छन् । मुख्यमन्त्री त्रिलोचन भट्टले मन्त्री बोहरालाई बर्खास्त गरेका हुन् ।
मुख्यमन्त्री भट्टका स्वकीय सचिव शिवसिंह ओलीले मन्त्री बोहरालाई संवैधानिक व्यवस्थाअनुसार मुख्यमन्त्रीले पदमुक्त गरेको जानकारी दिए ।
नेकपा विभाजनपछि प्रचण्ड–माधव समूहका केही नेताहरूले प्रधानमन्त्री केपी शर्मा ओलीनिकट मन्त्री बोहरालाई हटाउन मुख्यमन्त्रीलाई दबाब दिँदै आएका थिए ।
मन्त्री बोहराको ठाउँमा कसलाई नियुक्त गर्ने भन्नेबारे छलफल भइरहेको नेकपा (प्रचण्ड–नेपाल समूह) का एक नेताले बताए ।
मुख्यमन्त्रीका स्वकीय सचिव ओलीले भने केही दिनसम्म उक्त मन्त्रालय मुख्यमन्त्रीले आफ्नैमातहत राख्ने बताए ।
प्रचण्ड–नेपाल समूहका प्रदेश इन्चार्ज भीम रावलसँगको परामर्शपछि मुख्यमन्त्री भट्टले मन्त्री बोहरालाई पदमुक्त गरेका बताइएको छ ।
सात सदस्यीय प्रदेश मन्त्रिपरिषदमा ओली समूहबाट मन्त्री बनेका बोहरा एकजना मात्र हुन् । सुदूरपश्चिम प्रदेश सभामा ओली पक्ष कमजोर छ ।
५३ सदस्यीय प्रदेश सभामा सभामुखसहित नेकपाका ३९ जना सदस्य छन् ।
ओली समूहमा हालसम्म सातजना खुलेका बताइएको छ ।