Englishमुख्य समाचारसमाचारदृष्टिकोणफ्रन्ट पेजअर्थअन्तर्वार्तामल्टिमिडियाखेलकुदविश्वकोरोना अपडेटप्रवासकर्नर किकसम्पादकीय१३औँ वार्षिकोत्सव विशेषांकस्वास्थ्य र जीवनशैलीफिचरलाेकसेवाप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०२०प्रदेशटर्निङ प्वाइन्ट्स-२०१९ब्लग
  • वि.सं २०७७ असोज १२ सोमबार
  • Monday, 28 September, 2020
शिल्पा कर्ण काठमाडाैं
२०७६ चैत ४ मंगलबार ०७:३१:००
मुख्य समाचार

बालुवाटार जग्गा प्रकरण : पहिलो प्रतिवादी जेल चलान

शिल्पा कर्ण, काठमाडाैं
२०७६ चैत ४ मंगलबार ०७:३१:००

बालुवाटारस्थित ललितानिवासको सरकारी जग्गा हिनामिना मुद्दामा तत्कालीन मालपोत अधिकृत कृष्णप्रसाद पौडेल जेल चलान भएका छन् । विशेष अदालतका न्यायाधीश शिवराज अधिकारी र चन्द्रबहादुर सारूको सोमाबारको इजलासले पौडेललाई थुनामा पठाउने आदेश दिएको हो । 

ललितानिवास प्रकरणमा अदालतमा उपस्थित हुने पौडेल नै पहिलो प्रतिवादी हुन् । अख्तियार दुरुपयोग अनुसन्धान आयोगले गत २२ माघमा एक सय ७५ विरुद्ध अदालतमा मुद्दा दायर गरेको थियो । अदालतमा आफैँ उपस्थित भएका पौडेलले सरकारको निर्णय कार्यान्वयन गरेको भन्दै साधारण तारेखमा छाडिदिन माग गरेका थिए । तर, अदालतले पुर्पक्षमा राख्नुपर्ने आदेश दिएको हो । गम्भीर मुद्दाका प्रतिवादीलाई थुनामै राखेर मुद्दा अघि बढाइन्छ । मुद्दामा अख्तियारको तर्फबाट विशेष सरकारी वकिल कार्यालयका सहन्यायाधिवक्ता शंकर खत्रीलगायतले बहस गरेका थिए । 

बालुवाटारस्थित प्रधानमन्त्रीनिवास विस्तारको नाममा गलत लिखत तयार पारी नक्कली मोही खडा गरेर करिब १४ रोपनी जग्गा मासिएको अभियोग उनीमाथि छ । पौडेलविरुद्ध ३२ करोड १९ लाख २० हजार रुपैयाँ बिगो दाबी गरी मुद्दा दायर गरिएको छ । सोहीबराबरको रकम असुलको मागसमेत गरिएको छ । आठदेखि १० वर्ष कैद सजाय मागसमेत छ । भ्रष्टाचार निवारण ऐनअनुसार एक करोड रुपैयाँभन्दा धेरै बिगो हुने मुद्दामा आठदेखि १० वर्षसम्म कैद सजाय हुन्छ । 

यही मुद्दामा पौडेलसँगै तत्कालीन भौतिक योजनामन्त्री विजयकुमार गच्छदार र तत्कालीन सचिव दीप बस्न्यातविरुद्धसमेत मुद्दा दायर भएको छ । गच्छदार, बस्न्यातलगायतलाई नौ करोड ६५ लाख ७६ हजार रुपैयाँ बिगो दाबी गरी मुद्दा दायर गरिएको छ । अदालतले उनीहरूको नाममा समेत म्याद जारी गरिसकेको छ । 
‘अब एउटै प्रकृतिको मुद्दामा हाजिर हुन आउने अन्य प्रतिवादीलाई पनि यस्तै किसिमको आदेश हुने सम्भावना बढी छ,’ विशेष सरकारी वकिल कार्यालयका शाखा अधिकृत सञ्जित गौतमले भने । 

यो प्रकरणमा मालपोतका अन्य कर्मचारी उपसचिव हरिकृष्ण तिमल्सिना, अधिकृत परशुराम पोखरेल, प्रकाशनारायण भट्ट, नासु टंकनाथ पौडेल, उपसचिव प्रेमबहादुर खापुङ, नासु अर्जुन खतिवडा, अधिकृत कमल घिमिरे, सर्वेक्षक देवबहादुर लामिछाने पनि संलग्न थिए । त्यस्तै, अमिन भरतचन्द्र अर्याल, भूमिसुधार अधिकारी शंकरप्रसाद सुवेदी, नासु अंगुरकुमार सिग्देल, केदारबहादुर श्रेष्ठ, नापी अधिकृत जनक भण्डारी, उपसचिव हुपेन्द्र केसी, सहसचिव जितबहादुर थापालाई एउटै अभियोग लगाइएको छ । पूर्वभूमिसुधारमन्त्री डम्बर श्रेष्ठविरुद्ध समेत मुद्दा दायर भएको छ । त्यस्तै, इन्जिनियर राजेन्द्र श्रेष्ठ, सिडिई बालकृष्ण श्रेष्ठ, सुई सुुरोजराज राजकर्णिकार, सहसचिव अशोकनाथ उप्रेती, उपसचिव विनोदकुमार गौतम, अधिकृत कृष्णबहादुर राउतलाई समेत यही हिनामिनामा आयोगले मुद्दा दायर गरेको हो । 

माधवकुमार नेपाल प्रधानमन्त्री हुँदा मन्त्रिपरिषद्बाटै यस्तो निर्णय गराएर जग्गा मोही दिनेदेखि प्रधानन्यायाधीश र सभामुखनिवासको पर्खाल नै भत्काएर सडक विस्तार गरिएको थियो । बिचौलियाहरू शोभाकान्त ढकाल र रामकुमार सुवेदीको योजनामा सो काम भएको अख्तियारको दाबी छ । यसमा तत्कालीन प्रधानमन्त्री नेपालको समेत संलग्नता भएपछि मन्त्रिपरिषद्को निर्णयउपर मुद्दा चलाउन नमिल्ने कानुनी प्रावधानका कारण अख्तियारले उनीविरुद्ध मुद्दा चलाएन । उनीसँग बयान भने लिएको थियो । 

मन्त्रिपरिषद्कै निर्णयका आधारमा मालपोत कार्यालय डिल्लीबजारले जग्गा विभिन्न मोहीलाई दिने निर्णय गरेको थियो । पौडेल ०६५ देखि ०६८ सम्म मालपोत कार्यालय, डिल्लीबजारमा कार्यरत थिए । अख्तियारको बयानमा उनले भनेका थिए, ‘मिसिल नं. ४८४ (ता) मा दस्तखत गर्ने म पनि हुँ, तर म सम्बन्धित फाँटवाला होइन । म सम्बन्धित फाँटवाला नभएको र मन्त्रिपरिषद्को निर्णय कार्यान्वयनसम्म हो भनी त्यस फाँटका फाँटवाला आई भनेकाले मन्त्रिपरिषद्को निर्णय कार्यान्वयनसम्म हुनेगरी उठेको टिप्पणीमा दस्तखत गरेको हुँ ।’ 

सिआइबीको अनुसन्धान लम्बियो 

ललितानिवास हिनामिनामा प्रहरीको केन्द्रीय अनुसन्धान ब्युरो (सिआइबी)ले समेत अनुसन्धान गरिरहेको छ । तर, हालसम्म कसैलाई पक्राउ गरेको छैन । सिआइबीले यो प्रकरणमा अनुसन्धान थालेको एक वर्ष भइसकेको छ । उसले सरकारलाई प्रतिवेदन बुझाएको पनि दुई महिना नाघेको छ । प्रतिवेदनका आधारमा कारबाही गर्न गृह मन्त्रालयअन्तर्गतको नेपाल समरजंग कम्पनीले जाहेरी दिइसकेको छ । 

मुद्दालाई बलियो बनाउने गरी सूक्ष्म अनुसन्धान भइरहेको सिआइबीका अधिकारीहरू बताउँछन् । प्रतिवेदनमा उल्लेख भएका सबै व्यक्तिमाथि किटानी जाहेरी नआउँदा पनि अनुसन्धान लम्बिएको स्रोत बताउँछ । मुद्दामा उच्चपदस्थ व्यक्तिहरूसमेत जोडिएकाले सिआइबीको अनुसन्धान लम्बिएको हो ।