नेपाली सेनामा २८० अधिकृत क्याडेटको भर्ती खुल्यो

नेपाली सेनाले अधिकृत क्याडेट (सहायक सेनानी) पदमा २८० जनाका लागि आवेदन खुलाएको छ। सेनाको भर्ना छनोट निर्देशनालय, जंगी अड्डाले खुला तथा समावेशी प्रतिस्पर्धाबाट पदपूर्ति गर्न शुक्रबार सूचना जारी गरेको हो।

कुल २८० पदमध्ये खुलातर्फ १४६, महिलातर्फ २४, आदिवासी/जनजातितर्फ ३९, मधेशीतर्फ ३३, दलिततर्फ १८, पिछडिएको क्षेत्रतर्फ ६ र कर्तव्य पालनाका क्रममा मृत्यु भएका वा शारीरिक रूपमा अशक्त सैनिकका सन्ततिका लागि १४ पद छुट्याइएको छ।

योग्यता पुगेका नेपाली नागरिकले नेपाली सेनाको आधिकारिक अनलाइन प्रणालीमार्फत आवेदन दिन सक्नेछन्। नियमित दस्तुरमा साउन २९ गतेदेखि भदौ १८ गतेसम्म आवेदन दिन सकिनेछ। दोब्बर दस्तुर तिरेर भदौ १९ देखि २५ गतेसम्मसमेत आवेदन दिन सकिने व्यवस्था छ।

दरखास्त दस्तुर एक हजार रुपैयाँ तोकिएको छ। एकभन्दा बढी समावेशी समूहबाट प्रतिस्पर्धा गर्न चाहने उम्मेदवारले प्रत्येक थप समूहका लागि तोकिएको दस्तुरको २० प्रतिशत अतिरिक्त शुल्क बुझाउनुपर्नेछ।