बालकोट पुगेर राधिका शाक्यले भनिन्– नयाँ पुस्तालाई संग्रहालय छोडेर जाने विचार थियो, खरानी छोडेर जानु पर्ने भयो 

एमालेका अध्यक्ष केपी ओलीकी धर्मपत्नी राधिका शाक्यले जेन–जी आन्दोलनका क्रममा आगजनी गरिएको घरको शनिबार अवलोकन गरेकी छिन् । सो क्रममा शाक्यले नयाँ पुस्तालाई आफ्नो घर संग्रहालयको रुपमा छोडेर जाने विचार भए पनि खरानी छोडेर जानु पर्ने अवस्था आएको बताइन् । 

उनले जलेका पुस्तकका खरानीको टिका लगाउँदै आफूले यहाँ पुस्तकहरू जतन गरेर राख्ने गरेको, अध्यक्ष ओलीलाई देश विदेशबाट दिएका सम्मानपत्र तथा बहुमल्य वस्तुहरू समेत संग्राहलयको रुपमा सजाएर राखिएको बताइन् । ‘मलाई यो घर व्यवस्थापनमा ६ महिना लाग्यो,’ उनले भनिन्, ‘एउटा कोठामा स्वदेशमा प्राप्त सम्मानपत्र तथा मायाको चिनो र अर्को कोठामा चीन, कम्बोडिया, भारत, भियतनाम, जापान लगायतका देशका प्रधानमन्त्रीहरूले दिएका अमूल्य सामान थिए ।’ 

शाक्यले आगलागी भएको घरका विभिन्न कोठामा के के सामान थिए भनेर सम्झना गरिन् । ‘यति मेरो पसिना र श्रम परेको छ नि...’ शाक्यले भनिन, ‘ ‘बालुवाटार हुँदा पनि म साता १० दिनमा यहाँ आएर सामान मिलाउने र सफाइ गर्ने काम गर्थें ।’ उनले घर फेरी बनाउन सकिए पनि इतिहास फेरी बनाउन नसकिने बताइन् ।
जेन–जी आन्दोलनका अराजक जत्थाले  बालकोटस्थित अध्यक्ष केपी ओलीका दुवै घर जलाएका थिए ।