- वि.सं Invalid date format
जेन–जी आन्दोलनका क्रममा रुपन्देहीमा तोडफोड तथा आगजनीबाट भएको क्षतिको विवरण संकलन सुरु भएको छ । जिल्लाका सरकारी तथा गैरसरकारी संस्थामा भएको क्षति विवरण संकलन सुरु भएको हो ।
रुपन्देहीका प्रमुख जिल्ला अधिकारी डा. टोकराज पाण्डेले पूर्ण तथा आंशिक क्षति भएका सबैको विवरण संकलन सुरु भएको बताए । आन्दोलनका क्रममा बुटवल उपमहानगरपालिकासहित विभिन्न सरकारी कार्यालय तथा निजी क्षेत्रका व्यवसायीक प्रतिष्ठान एवं विभिन्न राजनीतिक दलका कार्यालय तथा केही नेताका घरहरूमा समेत क्षति भएको थियो । क्षतिको विवरण केही दिनभित्रै संकलन भइसक्ने प्रशासनले जनाएको छ ।
रुपन्देहीमा भैरहवा भन्सार कार्यालयसहित भैरहवाका केही सरकारी कार्यालयमा क्षति पुगेको थियो । त्यस्तै, बुटवलमा बुटवल उपमहानगरपालिकासहित आन्तरिक राजश्व कार्यालय बुटवल, इलाका प्रशासन कार्यालय बुटवलसहित विभिन्न सरकारी कार्यालयहरूमा क्षति पुगेको छ । क्षति पुगेका कार्यालयहरूबाट पनि आधारभुत सेवाहरू दिन थालिएको प्रजिअ पाण्डेले बताए ।
रुपन्देहीमा बुटवलको सुख्खानगर रहेको भाटभटेनी सुपरमार्केट, बुटवलस्थित ड्रिम इन्टरनेशनल होटल, तिलोत्तमामा रहेको होटल टुलिप, मणिग्राममा रहेको होटल ड्रिमल्याण्डसहित भैरहवा क्षेत्रका पनि केही व्यवसायीक प्रतिष्ठानमा क्षति पुगेको थियो ।
