- वि.सं २o८२ भदौ १५ आइतबार
गणेश भगवानको मूर्ति विसर्जनका क्रममा मुस्लिम समुदायले राखेको झन्डा उखेले भन्दै उत्पन्न विवादमा एक दर्जन प्रहरी घाइते भएका छन् । शनिबार मूर्ति विसर्जनका क्रममा केही हिन्दु युवाले मुस्लिम समुदायले गाडेको झन्डा उखेलेको आरोप छ ।
उक्त विवाद आइतबार पनि जारी रहँदा प्रहरीले सार्वजनिक स्थानमा राखेका दुवै समुदायको झन्डा उखेलेको थियो । यही क्रममा प्रहरी र केही हिन्दु युवाबिच झडप भएको धनुषाका प्रहरी उरीक्षक (एसपी) नरहरि रेग्मीले जानकारी दिए । जनकपुरधाम उपमहानगरपालिका–२० रुपैठामा झण्डा उखल्ने क्रममा विवाद आज विवाद भएको हो ।
उनका अनुसार, प्रहरीले विवाद नियन्त्रणमा लिन खोज्दा हिन्दु पक्षका युवाले ढुंगामुढा गरेपछि १२ जना प्रहरी घाइते भएका छन् । त्यस्तै हिन्दु पक्षका २९ वर्षीय पञ्चेश्वर मुखिया पनि घाइते भएका छन् । स्थितिलाई नियन्त्रणमा लिन प्रहरीले केही राउण्ड अश्रुग्यास प्रहार गरेको थियो ।
यसैगबिच आज बिहान घाँस काट्न गएका दुई मुस्लिम महिलामाथि समेत हिन्दु युवाहरूले कुटपिट गरी घाइते बनाएको प्रहरीको भनाइ छ । शनिबारको विवादका क्रममा पनि प्रहरीले ११ राउन्ड अश्रुग्यास प्रहार गरेको थियो ।
किन भयो विवाद ?
स्थानीय गणेश युवा समितिले गणेश भगवानको मूर्ति बनाई शनिबार दिउँसो १ बजे विसर्जनका लागि ट्याक्टरमा राखेर नोचा ठाकुर पोखरीतर्फ लैजाँदै थियो । विसर्जन टोलीमा जिल्ला प्रहरी कार्यालय धनुषाबाट खटिएका सुरक्षाकर्मी, वडाध्यक्ष भोला कवाडी र समितिका सदस्यहरूसमेत सहभागी थिए ।
वडाध्यक्ष कवाडीले आफू मुस्लिम भए पनि विसर्जन टोलीसँगै मोटरसाइकलमा रहेको बताए । उनका अनुसार टोली बसहिया मोड पार गरेपछि केही व्यक्तिले मुस्लिम समुदायले गाडेको झन्डा उखेलेपछि विवाद सुरु भएको हो ।
रुपैठास्थित सडक खण्डमा हिन्दु समुदायले भगवा (केशरी) र मुस्लिम समुदायले हरियो रङका झण्डा गाड्ने चलन छ । वडाध्यक्ष कवाडीले भने, ‘दुवै समुदायले आ–आफ्नो झन्डा गाडेका छन्, तर एकले अर्काको झन्डा उखेल्नुहुँदैन। बाहिरबाट आएका केही व्यक्तिले मुस्लिम समुदायको झन्डा उखेल्दा विवाद सुरु भयो ।’
