- वि.सं २o८२ भदौ १३ शुक्रबार
म्यानचेस्टर युनाइटेडले नयाँ सिजन २०२५/२६ का लागि खेलाडी भित्र्याउन राम्रो लगानी गरेको छ । तर, लगानीअनुसार नतिजा निकाल्न चुकेको छ । इंग्लिस प्रिमियर लिगको पहिलो खेलमा पराजित हुँदै म्यानचेस्टरले खराब सुरुवात गर्यो । बुधबार राति म्यानचेस्टरले लिग कपको दोस्रो चरणमा चौथो डिभिजनको क्लब ग्रिम्सबी टाउनविरुद्ध प्रतिस्पर्धा गरेको थियो । आफूभन्दा निकै कमजोर प्रतिद्वन्द्वीसँग म्यानचेस्टर पेनाल्टी सुटआउटमा १२–११ ले स्तब्ध भयो । यससँगै म्यानचेस्टर लिग कपबाट बाहिरिएको छ ।
खेलको पहिलो हाफमै टाउनले घरेलु मैदानको फाइदा लिँदै २–० को अग्रता लिएको थियो । खेलमा उत्कृष्ट पुनरागनम गर्दै म्यानचेस्टरले दोस्रो हाफमा दुई गोल फर्काएको थियो, तर पेनाल्टी सुटमा हारको सामना गर्यो । हारसँगै म्यानचेस्टरका प्रशिक्षक रुबेन अमोरिमले चर्को आलोचना सामना गरेका छन् । उनले खराब प्रदर्शनका कारण क्लबले लज्जास्पद हारको सामना गरेको स्विकारेका छन् । ‘चौथो डिभिजन क्लबविरुद्ध उत्कृष्ट प्रदर्शन गर्न सकेनौँ ।
हारको सबै जिम्मेवारी लिन्छु,’ उनले भने, ‘वास्तवमै विपक्षी टोली तुलनात्मक रूपमा कमजोर थियो, तर हामीले क्षमताअनुसार प्रतिस्पर्धा गरेनौँ ।’ निर्धारित ९० मिनेट र थप गरिएको समयमा म्यानचेस्टर र टाउनले २–२ को बराबरी खेलेका थिए ।
खेलको नतिजा टाइब्रेकरबाट भयो । यसमा टाउनले शीर्ष डिभिजनको म्यानचेस्टरमाथि सनसनी जित निकाल्दै तेस्रो चरणको स्थान पक्का गर्यो । प्रतिस्पर्धामा म्यानचेस्टरले टाउनमाथि एकपक्षीय दबाब राखेको थियो । टाउनले प्राप्त दुई अवसरमा गोल गरेको थियो । म्यानचेस्टरले विपक्षीको पोस्टमा २८ वटा शक्तिशाली प्रहार गर्यो । यसविरुद्ध टाउनले म्यानचेस्टरको पोस्टमा १० पटक मात्र पोस्ट चार्ज गरेको थियो । प्रतिस्पर्धामा म्यानचेस्टरले ७१ प्रतिशत बल पोसेसन राखेको थियो । टाउनले खेल अवधिभर २९ प्रतिशत मात्र बलमाथि नियन्त्रण राखेको थियो । सबै पक्षमा बलियो हुँदाहुँदै म्यानचेस्टर दोस्रो चरणबाटै बाहिरिएपछि समर्थक दु:खी भएका छन् । समर्थक र क्लबका पूर्वखेलाडीले प्रशिक्षक रुबेनको आलोचना गरेका छन् ।
खेलमा धेरै कमजोरी
प्रशिक्षक रुबेलले प्रतिस्पर्धामा आफूहरूले निर्धारित र अतिरिक्त समयमा धेरै गल्ती गरेको बताएका छन् । उनले खेलाडीहरूले आशा गरेअनुसार प्रतिस्पर्धा गर्न नसकेको बताए । ‘नसोचेको नतिजा निकाल्यौँ । हार स्विकार्नुको विकल्प छैन,’ उनले भने, ‘हामीले समर्थकसँग माफी माग्नैपर्छ । आगामी दिनमा राम्रो नतिजा निकाल्न परिवर्तनको खाँचो देखिन्छ ।’ तुलनात्मक रूपमा म्यानचेस्टर सबै पक्षमा बलियो भए पनि फिनिसिङमा अत्यन्तै कमजोर भएको प्रशिक्षक रुबेलले बताए । ‘हाम्रा खेलाडी राम्रो खेले पनि फिनिसिङमा चुकेका देखिन्छन् ।
हामीभन्दा पनि स्तरीय प्रदर्शन टाउनका खेलाडीले गरे,’ उनले भने, ‘राम्रो प्रदर्शन र फिनिसिङ गोल गर्न सक्ने टोली नै जितको हकदार हो । सुरुदेखि उनीहरू दबाबमुक्त थिए ।’ अब टाउनले सेफिल्ड वेडनसडेको सामना गर्नेछ । यसैगरी, आर्सनल, चेल्सी, म्यानचेस्टर सिटी, टोटनह्याम पनि तेस्रो चरणमा पुगेका छन् ।
