Skip This
ताप्लेजुङको फुङलिङमा जारी तेस्रो अन्तर्राष्ट्रिय आमन्त्रण ताप्लेजुङ गोल्ड कप फुटबल प्रतियोगितामा सहारा क्लब पोखरा झापाको रेड स्टार फुटबल क्लबसँग २–० ले पराजित भएको छ ।
आइतबार सम्पन्न दोस्रो क्वार्टरफाइनल खेलमा रेड स्टारले सहारा क्लबलाई २–० गोलले पराजित गर्दै सेमिफाइनलमा प्रवेश गरेको हो ।
झापाका तर्फबाट सविन लिम्बूले खेलको ७७औँ मिनेट १ गोल गर्दै झापालाई अग्रता दिएका थिए । आक्रामक खेल खेले पनि सहारा क्लबले हार व्यहोर्नुपर्यो । खेलको दोस्रो हाफको इन्जुरी समयमा पनि पुनः उनै सविन लिम्बूले १ गोल गर्दै २–० बनाउँदै आखिरी रेडहर्स सेमिफाइनलमा प्रवेश गरेको छ ।
अब झापाको रेड स्टार क्लबले सिरहा र पाँचथरबिचको विजेतासँग सेमिफाइनल खेल खेल्ने आयोजक समितिका सचिव टिकेन्द्र नेपालीले बताए । प्रतियोगिताअन्तर्गत सोमबार भारत र काठमाडौँका टोलीबिच प्रतिस्पर्धा हुने आयोजकले बताएको छ ।
प्रतियोगितामा भारतसहित नेपालका चार प्रदेशका प्रतिष्ठित क्लबहरूको सहभागिता रहेको छ । फाइनल खेल ३१ साउनमा हुनेछ । गोल्डकप विजेता टोलीले नगद सात लाख दुई हजार ८२ रुपैयाँसहित ट्रफी, मेडल र प्रमाणपत्र प्राप्त गर्नेछन् भने उपविजेताले तीन लाख ५० हजार ८२ रुपैयाँसहित ट्रफी, मेडल र प्रमाणपत्र प्राप्त गर्ने सचिव नेपालीले जानकारी दिए ।
यस्तै, प्रतियोगिताका उत्कृष्ट खेलाडीले मोटरसाइकल पुरस्कारस्वरूप पाउने आयोजक समितिका अध्यक्ष सागर मादेनले जानकारी दिए ।
