- वि.सं Invalid date format
शेर्पा समुदायको साहसिक जीवन र सांस्कृतिक सम्पदालाई पर्दामा उतार्ने नेपाली चलचित्र ‘शेर्वा – द लाइफ अफ हिमालय’ बन्ने भएको छ।
सन् २०२६ मा अन्तर्राष्ट्रिय रूपमा प्रदर्शनमा आउने गरी उक्त चलचित्रको निर्माण भइरहेको हो। निर्माण पक्षका अनुसार चलचित्रले हिमाली जनजीवनको यथार्थलाई पर्दामा भावनात्मक र दृश्यात्मक रूपमा प्रस्तुत गर्नेछ । अभिनेता बुद्धि तामाङ चलचित्रको मुख्य भूमिकामा रहनेछन् ।
चलचित्रको निर्देशन कर्मा शेर्पा र दुर्लभ जन्तरेले संयुक्त रूपमा गरेका छन्। फिल्मको कथा कर्मा शेर्पाले लेखेका हुन्। यस्तै, पटकथा सुमन गजमेर, छायांकन रञ्जित श्रेष्ठ, संगीत संयोजनमा अटल राई र गायनमा सचिन राई छन्। शेर्पा फिल्म्सको प्रस्तुति र डके एक्सपिडिसनको सहकार्यमा निर्माण गरिएको चलचित्र अहिले पनि निर्माणकै चरणमा छ ।
यसबाट हिमाली समुदायको वास्तविक प्रतिनिधित्व र नयाँ कलाकारको उदयलाई प्रोत्साहन गर्ने लक्ष्य लिएको कर्मा शेर्पाले बताए । ‘हाम्रो उद्देश्य सिंगो हिमाली समाजको कथा संसारभर पुर्याउनु हो,’ निर्देशक शेर्पाले भने, ‘जहाँ साहस, संस्कृति र आत्मबल मिसिएको जीवन पाइन्छ।’ चलचित्रलाई विभिन्न अन्तर्राष्ट्रिय फिल्म महोत्सवमा सहभागी गराउने योजनासमेत रहेको अर्का निर्देशक दुर्लभ जन्तरे बताए ।
‘शानदार छायांकन, मौलिक संगीत र यथार्थ कथावस्तुमा आधारित यस चलचित्रले नेपाली सिनेमामा दुर्लभ विषय उठाउँदैछ,’ जन्तरेले भने, ‘शेर्वा – द लाइफ अफ हिमालय’ अन्तर्राष्ट्रिय फिल्म महोत्सवमा पनि सहभागी हुने फिल्म बन्नेछ । उनले हिमालजत्तिकै विशाल भावनात्मक गहिराइ बोकेको यस फिल्मले दर्शकको मन छुने विश्वाससमेत व्यक्त गरे ।
