प्रधानमन्त्रीको स्वागतमा गएका सुदूरपश्चिमका दुई मन्त्री सवार गाडी एक–आपसमा ठोक्किए

प्रधानमन्त्री केपी ओलीको स्वागतका लागि लम्की पुगेका सुदूरपश्चिम प्रदेश सरकारका दुईजना मन्त्री सवार गाडी एक–आपसमा ठोक्किएर दुर्घटना भएको छ। प्रदेशका भौतिक पूर्वाधार विकासमन्त्री सुरेन्द्रबहादुर पाल र आन्तरिक मामिला तथा कानुनमन्त्री हिरा सार्की सवार गाडी लम्कीमा ठोकिएका हुन्।

मन्त्री पाल सवार बा.२झ १४१९ नम्बरको गाडीलाई मन्त्री सार्की सवार से.१झ ३३० नम्बरको गाडीले लम्कीमा ठक्कर दिएको जिल्ला प्रहरी कार्यालयले जनाएको छ। दुवै गाडीमा क्षति पुगे पनि गाडीमा सवार मन्त्रीसहित अन्यलाई भने केही नभएको जिल्ला प्रहरी कार्यालयका प्रवक्ता प्रहरी नायब उपरीक्षक राजकुमार सिंहले बताए।

रानीजमरा कुलरिया सिँचाइ आयोजनाअन्तर्गत कैलालीको कटासेमा निर्मित जलविद्युत् आयोजनाको उद्घाटन गर्न आएका प्रधानमन्त्रीलाई स्वागत गर्न जाने क्रममा दुर्घटना भएको हो। दुर्घटनामा दुवै गाडी कच्याककुचुक भएका छन्।