मौद्रिक नीतिपछि पनि बढ्न सकेन सेयर बजार

आइतबार २९ अंकले बढे पनि सोमबार ३५.०९ घट्यो

राष्ट्र बैंकले पुँजी बजारलक्षित लचिलो नियमसहित मौद्रिक नीति ल्याए पनि सेयर बजारमा भने तीव्र उचारचढाव देखिएको छ । आगामी आर्थिक वर्ष ०८२/८३ को मौद्रिक नीतिमार्फत गभर्नर विश्वनाथ पौडेलले बैंक तथा वित्तीय संस्थाहरूबाट सेयर धितोमा प्रवाह हुने मार्जिन प्रकृतिको कर्जाको विद्यमान एकल ग्राहक कर्जासीमा १५ करोड रुपैयाँबाट बढाई २५ करोड रुपैयाँ पुर्‍याएका छन् । सेयर धितो कर्जाको सीमा बढाएपछि त्यसको मनोवैज्ञानिक असर लगानीकर्तामा पर्ने र नेप्से परिसूचक बढ्ने अपेक्षा गरिएको थियो । मौद्रिक नीतिपछि बजार खुलेको पहिलो दिन आइतबार २९ अंकले बढेर परिसूचक २७६०.८ विन्दुमा पुगेको पनि थियो । तर, दोस्रो दिन सोमबार परिसूचक ३५.०९ अंकले घटेर २७२५.७१ विन्दुमा पुगेको छ । 

राष्ट्र बैंकले खुकुलो बनाएको यो नियामकीय व्यवस्थालाई कार्यान्वयनमा आउनका लागि बैंक तथा वित्तीय संस्थालाई परिपत्र गर्नुपर्ने भएकाले लगानीकर्ता अझै ‘पर्ख र हेर’को अवस्थामा रहेको देखिन्छ । विगतमा राष्ट्र बैंकले मौद्रिक नीतिमा नियामकीय व्यवस्था खुकुलो बनाए पनि परिपत्रमा कर्जाको जोखिमभार बढाएर कसिलो बनाउने गरेको थियो । त्यसबाहेक नियमाकीय व्यवस्था खुकुलो बनिसकेपछि बैंक तथा वित्तीय संस्थाबाट जाने कर्जा प्रवाहले पनि सेयर बजार वृद्धि हुन सक्ने आकलन गरिएको छ ।

सोमबार कारोबारमा आएका अधिकांश परिसूचक घटेका छन् । जलविद्युत् समूहको परिसूचकमा भने वृद्धि भएको छ । जलविद्युत् समूहको परिसूचक ०.१५ प्रतिशतले घटेको छ । बैंकिङ समूहको परिसूचक २.४६ प्रतिशतले घटेको छ भने विकास बैंक समूहको परिसूचक १.४८ प्रतिशतले घटेको छ । फाइनान्स समूहको परिसूचक १.१३ प्रतिशतले घटेको छ । होटेल तथा पर्यटन समूहको परिसूचक ०.२५ प्रतिशतले घटेको छ । लगानी समूहको परिसूचक १.२५ प्रतिशतले घटेको छ । जीवन बिमा १.३६ प्रतिशत, उत्पादन तथा प्रशोधन ०.७८ प्रतिशत, माइक्रोफाइनान्स १.२३ प्रतिशत, सामूहिक लगानी कोष ०.१७ प्रतिशत, निर्जीवन बिमा १.०५ प्रतिशत, व्यापार समूह ०.६४ प्रतिशत र अन्य समूह १.२४ प्रतिशतले घटेको छ । सेयर बजारमा सोमबार आठ अर्ब १७ करोड रुपैयाँको कारोबार भएको छ । दुई करोड ११ लाख दुई हजार पाँच सय ४० कित्ताको सेयर किनबेच भएको छ । 

न्यून ब्याजदरले बजार बढाउने अनुमान
राष्ट्र बैंकले मौद्रिक नीतिमार्फत ब्याजदर करिडोरका दरहरूलाई घटाएको थियो । माथिल्लो (नीतिगत दर) र तल्लो सीमा (निक्षेप संकलन दर)को ब्याजदरलाई घटाएको हो । यसबाट मुद्दती निक्षेपको ब्याजदर घटाउन मद्दत पुग्ने देखिन्छ । सामान्यतया ब्याजदर सस्तो भएका वेलामा निक्षेपतर्फको आकर्षण घट्ने र सेयर बजारमा लगानी बढ्ने प्रवृत्ति हुन्छ । बैंक तथा वित्तीय संस्थाले लागू गर्ने नयाँ निक्षेपको ब्याजदर घटेर आएपछि सेयर बजारमा लगानी बढ्ने आकलन विज्ञहरूको छ ।