- वि.सं Invalid date format
विषालु च्याउ खाँदा एकै परिवारका तीनजना बिरामी परेका छन् । बिरामी पर्नेहरूमा मुसिकोट नगरपालिका– ४, दिगामचौरका ६८ वर्षीया फूलमाया कुमाल, ७६ वर्षीय थम्मनबहादुर कुमाल र ३६ वर्षीया गीता कुमाल रहेका जिल्ला प्रहरी कार्यालयका सूचना अधिकारी एवं प्रहरी नायब उपरीक्षक गंगाबहादुर सारूले जानकारी दिए ।
बिहीबार जंगलबाट टिपेर ल्याएको च्याउ पकाएर खाएपछि गएराति नै उनीहरूलाई टाउको दुख्ने, रिँगटा लाग्ने र बान्ता हुनेजस्ता लक्षण देखिएको थियो । बिरामी भएका तीनैजनालाई गएराति उपचारका लागि पाल्पास्थित लुम्बिनी मेडिकल कलेज प्रभास पठाइएको थियो ।
घटनाको जानकारी पाउनासाथ गएराति नै इन्द्रगौडा प्रहरी पोस्टबाट प्रहरी हवल्दार कृष्णमोहन केवटको नेतृत्वमा खटिएको प्रहरी टोलीले तीनैजनालाई उपचारका लागि तत्कालै पाल्पा पठाएको थियो । उनीहरूको अवस्था खतरामुक्त रहेको प्रहरीले जनाएको छ ।
