- वि.सं २o८२ असार ४ बुधबार
तमानखोला गाउँपालिकाले दलित समुदायका युवालाई आयआर्जनसँग जोड्न बाँसका सामग्री बनाउने तालिम दिन थालेको छ । गाउँमा पाइने बाँस तथा निगालेलाई उपयोग गरी युवालाई उद्यमी बनाउने उद्देश्यले तालिम दिन थालिएको हो ।
उच्च पहाडी क्षेत्रमा पर्ने तमानखोलामा पर्याप्त बाँस तथा निगालो पाइने हुँदा तालिमबाट सीप सिकेर त्यसलाई आयआर्जनको माध्यम बनाउन सकिनेछ । बुढापाकाले वर्षौँदेखि परम्परागत रूपमा ढालो, नाङ्लो, डोरीलगायत सामग्री बनाएर प्रयोग गर्दै आए पनि बिक्री कम हुँदै आएको थियो ।
बजारमा बिक्ने सामग्री निर्माण गरेर युवालाई उद्यमी बनाउने उद्देश्यले तालिम दिइरहेको गाउँपालिकाका अध्यक्ष जोकलाल बुढा मगरले बताए। पालिकाले चालू आर्थिक वर्षमा विनियोजन गरेको रु. चार लाख ७५ हजारले युवालाई तालिम दिएको उनले जानकारी दिए।
ललितपुरबाट प्रशिक्षक झिकाएर १५ दिने तालिम दिइरहेको अध्यक्ष बुढा मगरले बताए । उनले भने, ‘बाँसबाट गाउँमा अहिले बुढापाकाले विभिन्न सामग्री बनाउने गर्छन्, उनीहरूले बनाए पनि घरायसी प्रयोजनका लागि मात्रै प्रयोग हुन्छ, बजारमा लगेर बिक्री गर्ने प्रचलन कम भएकाले पुस्ताले त्यसतर्फ केन्द्रित गर्न खोजेका छौँ। युवालाई बाँसबाट आकर्षक सामग्री बनाउन सिकाएर उद्यमी बन्न प्रेरित गरिरहेका छौँ, उहाँहरूले सीप सिकेर उत्पादन गर्न थाले भने त्यसको बिक्रीमा समस्या भए पालिकाले सहजीकरण गर्नेछ ।’
तालिममा गाउँपालिकाका ६ वटै वडाका युवाहरू सहभागी छन् । युवालाई फोटो फ्रेम, कुर्ची र टेबललगायत सामग्री बनाउने सिप सिकाइने अध्यक्ष बुढामगरले उल्लेख गरे। सिप सिकेर युवाले सामग्री बनाउन थालेपछि वनजंगलमा खेर गइरहेका बाँस र निगालो प्रयोगमा आउने उनकाे भनाइ छ ।
तालिममा सहभागी धनीराम घमालले बाँसको चाेयाबाट आकर्षक सामग्री बन्ने भएकाले प्रशस्त आम्दानी गर्न सकिने बताए । आफूले पहिलेदेखि मुढा बनाउने गरेको भन्दै अहिले तालिमबाट थुप्रै प्रकारका सामग्री बनाउन सिकिरहेको उनले उल्लेख गरे ।
तालिमपछि बाँसका सामग्री बनाएर आफ्नै आयआर्जन सर्न सकिने आत्मविश्वास बढेको उनले बताए । ‘हाम्रो गाउँघरमा पाइने बाँसबाट प्रयोगमा आउने आकर्षक सामान बनाउन सकिन्छ । अहिलेसम्म हामीले मेसो पाएका थिएनौँ, प्रशिक्षक सरले आकर्षक सामान बनाउन सिकाएका छन्।आगामी दिनमा बाँसका सामग्री बनाएर बिक्री गर्ने योजना छ,’ घमालले भने, ‘आर्थिक अवस्था कमजोर छ, पालिकाले सहयोग गर्यो भने सानोतिनो उद्यम गर्ने योजना छ ।’
