- वि.सं २o८२ असार ४ बुधबार
बाराको जितपुर–सिमरा उपमहानगरपालिका– २१ अमलेखगन्जमा बाघको आक्रमणबाट एक स्थानीयको ज्यान गएको छ । बाघको आक्रमणबाट स्थानीय ५० वर्षीय चन्द्रबहादुर ब्लोनको ज्यान गएको हो ।
गाउँछेउको जंगलमा मंगलबार दिउँसो बाख्रा चराउन गएका ब्लोनको शव दक्षिणकाली सामुदायिक वन क्षेत्रको जंगलमा बुधबार बिहान फेला परेको हो । साँझ अबेलासम्म पनि जंगलबाट नफर्किएपछि आफन्त र स्थानीयले उनको खोजी गरिरहेका थिए । जंगलमा खोज्दै जाने क्रममा बाघले क्षतविक्षत पारेर खाँदै गरेको अवस्थामा स्थानीयले ब्लोनको शव फेला पारेको जितपुर–सिमरा– २१ वडाध्यक्ष सुवास श्रेष्ठले जानकारी दिए।
शव फेला परेपछि तत्कालै प्रहरी, जनप्रतिनिधि र स्थानीयवासी घटनास्थल पुगेका छन् । अविवाहित ब्लोन लामो समयदेखि दिदीभिनाजुको घरमा बस्दै आएका थिए।
